![](https://edersaas.ru/wp-content/uploads/2020/04/koronavirus-laboratoriya.-foto-RIA-Novosti-696x464-2.jpg)
Бүгүн, муус устар 21 күнүгэр, сарсыарда 11:00 чааска Саха сирин Ил Дархана Айсен Николаев эрэгийиэҥҥэ коронавирус балаһыанньатын туһунан брифинг ыытта.
Ил Дархан Айсен Николаев: «Бүгүн сарсыардааҥҥы дааннайдарынан, өссө биэс киһи ыарыйда: Дьокуускайга — үс, Алдаҥҥа — биир, Бүлүүгэ — биир.
Дьокуускайга 82 саастаах дьахтар ыарыйда, кини «внебольничная пневмониялаах» суһал көмөнөн балыыһаҕа киирдэ. Оттон икки киһи ыарыылаах дьону кытта хантаактаспыттара биллэр. Ыалдьыбыт дьон бары өрөспүүбүлүкэ стационардарыгар эмтэнэллэр, хантаактаспыт дьонун быһаара, анаалыс тута сылдьаллар», — диэтэ.
Ыарыы туруоҕуттан Саха сирин үрдүнэн 116 киһи коронавируска сутулунна. Онтон 23-һэ Чайыҥдаҕа уонна Ямало-Ненецкэй автономнай уокурукка баар, 16 киһи үтүөрдэ, 77 киһи эмтэнэр (Алдаҥҥа — 42, Дьокуускайга — 25 (ол иһигэр Горнайтан — 2, Ленскэйтэн — 1, Бүлүүттэн — 1), Ленскэйгэ — 2, Бүлүүгэ — 2, Сунтаарга — 2, Мииринэйгэ — 1).
Бэҕэһээҥҥи суукка иһигэр лабораториялар 1357 анаалыһы туттулар. Оттон 425 киһи обсерватордарга баар.
edersaas.ru