Хаҥалас улууһун «Орто дойду» этнокомплексыгар «ТАБЫС» («Таптаа, алҕаа, байыт ытык сиргин») диэн ыччат бэстибээлэ буола турар. Бу чэрчитинэн мустубут хамаандалар кроссфикка күрэхтэстилэр.
Кроссфит түһүмэҕин ыыта кроссфит-атлет Игнат Чомчоев кэллэ. Кини күрэхтэһии туһунан маннык билиһиннэрэр:
— Ыччат министиэристибэтэ үлэлэһиэххэ диэн этии киллэрбитин быһа гыммакка тута сөбүлэспиппит. Спорт бу көрүҥүнэн дьарыктанар киһи олох хайа баҕарар түгэнигэр бэлэм буолар. Ол курдук, кроссфит киһини дэгэттэр буоларга үөрэтэр, дьарыктыыр. Сүүрүүттэн саҕалаан араас ыарахан эрчиллиилэр бааллар. «ТАБЫС» бэстибээлгэ 20-чэ хамаандаттан сайаапка киирдэ. Хамаандаҕа икки уол уонна биир кыыс киирэр. Ыччаты тута наһаа ноҕуруускалаабат туһуттан чэпчэки түһүмэхтэртэн саҕалаатыбыт — сүүрүү, ыйааһыннары таһыы, тренажердарга үлэ уо.д.а. Кроссфит бу сылтан бэстибээл бырагырааматыгар киирэн сыллата ыытылла турара буоллар бэрт буолуо этэ.
Айтана Аммосова, edersaas.ru