Ил Дархан Айсен Николаев бүгүҥҥү Анал этиитигэр Таатта улууһун Кыйы сэлиэнньэтин олохтооҕо, Дьоруой ийэ Кристина Игнатьева санаатын үллэһиннэ.
— СӨ Ил Дархана Айсен Сергеевич Николаев Анал этиитин биһирии иһиттим. Урут Ийэ сыла биллэриллибитин өйдөөбөппүн. Кыра даҕаны көмө элбэх оҕолоох ыалга туһалаах, суолталаах. Дьиэ кэргэҥҥэ сыһыаннаах этиилэриттэн олус үөрдүм, тылбынан даҕаны кыайан тиэрдибэппин.
Уонна тыа хаһаайыстыбатыгар сыһыаннаах этиилэрин биһирээтим. Тыа ыалын сиэринэн 2005 сыллаахха аймахтарбытын кытта кыттыһан бааһынай хаһаайыстыба тэриммиппит. 2015 сыллаахха Грант ылан 100 сүөһү турар хотонун туттубуппут. Кыһынын-сайынан дьон сүөһүтүн көрөр өҥөлөөхпүт. Инньэ гынан, үстэригэр уонна үстэриттэн сэттэлэригэр диэри саастаах оҕолорго көрүллэр төлөбүртэн маттыбыт. Кырабытыгар биир сыл ылбытым, быстыбыта сыл буолла. Тутуһаллара диэн эппит-аспыт бэйэбититтэн, оччолоох ороскуот син биир буолар. Быйыл от үүнүүтэ мөлтөх буолан эбии от атыылаһабыт, саппаас чаас даҕаны сыаналаах, сирбитин түүлэһэн олоробут.
Тыа ыала сүөһүтэ-аһа суох хайдах даҕаны табыллыбат. Тыа хаһаайыстыбатыгар оҕолорбут эмиэ сыстаҕастар, бэйэбитин кытта батыһыннара сылдьан үлэҕэ уһуйабыт, — диэн ыал ийэтэ санаатын үллэстэр.
Людмила ПОПОВА, “Саха сирэ” хаһыат, edersaas.ru