Бэс ыйын 24 күнүгэр Дьокуускайга Арассыыйа инновационнай эрэгийиэннэрин ассоциацията мунньахтаата. Манна 10-тан тахса эрэгийиэнтэн бэрэстэбиитэллэр, Ассоциация чилиэннэрэ кыттыыны ыллылар.
Мунньахха сааҥсыйа усулуобуйатыгар экэниэмикэни өйүүр миэрэлэри, бэйэ оҥорон таһаарыыны сайыннарыы, омук табаардарын солбуйар технологиялары, о.д.а. боппуруостары кэпсэттилэр.
Ассоциация чилиэннэрэ IT-Пааркаҕа, Арктикатааҕы инновационнай кииҥҥэ, ХИФУ естественнэй наукаларын институтун полимернай нанокомпозиттарын лабораторияларыгар, ФТИ графеновай нанотехнологиялар лабораторияларыгар сылдьыахтара. Ону тэҥэ, Туймаада ыһыаҕар сылдьан, саха норуотуни култууратын кытары билсиэхтэрэ. Манна Sakha Innovation-2022 быыстапканы көрүөхтэрэ.
Яков Геллер, “Татарстан Өрөспүүбүлүкэтин судаарыстыбаннай сакааска ааҕыныстыбатын” генеральнай дириэктэрэ, бастакы күн түмүгүнэн санаатын үллэһиннэ:
— Татарстан – Арассыыйаҕа бары хайысхаларынан бастыҥ көрдөрүүлээх эрэгийиэн. Экэниэмикэҕэ, инновацияларга, инвестицияларга лиидэр буолар. Быйылгы Санкт-Петербурдааҕы экэнэмиичэскэй пуорумҥа (ПМЭФ) Москва кэнниттэн, 2-с миэстэ буоллубут. Онон атын эрэгийиэннэри үөһэттэн соҕус көрөөччүбүт, ол баар суол.
Бүгүн Саха сиригэр көрбүппүттэн-истибиппититтэн сөхтүбүт диэххэ сөп. Креативнай индустрия хайысхата сабыс-саҥа салаа буолар, онон мин тус бэйэм манныгы кэтэспэтэҕим. Саха сирин олохтоохторо Аҕа баһылыккыт Айсен Николаев, инновацияҕа миниистиргит Анатолий Семенов салалталарынан ыраахха хардыылаабыт эбиккит. Уһук Илин эрэгийиэнигэр инновационнай экосистиэмэҕэ, IT-эйгэҕэ лиидэр буолбуккут. Онон, бу сөхпүппүттэн бэйэм да астынным.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru