Бүгүҥҥүттэн Красноярскайга ССРС, Россия уонна Грузия үтүөлээх тренерэ Дмитрий Георгиевич Миндиашвили аатынан Тустуу академиятын бирииһигэр көҥүл тустууга Бүтүн Россиятааҕы аһаҕас турнир саҕаланна. Россия бөҕөстөрүн таһынан бу турнирга Казахстан тустууктара эмиэ кытталлар. Бырагыраама быһыытынан, бүгүн – 57, 65, 97 кг, сарсын – 61, 86, 125 кг уонна өйүүн – 70, 74 кг ыйааһыннарга хапсыһыылар ыытыллаллар. Бу күрэхтэһиигэ саха тустууга кыһатын иитиллээччилэрэ эмиэ кытталлар.
Кылгастык бүгүҥҥү ыйааһыннар сэрэбиэйдэрин билиһиннэрдэххэ, 57 киилэҕэ барыта 65 (!) бөҕөс күөн көрсөр. Сүрүннээн, Бурятия, Казахстан, Тыва, Саха сирин бөҕөстөрө. Саха сириттэн барыта 17 бөҕөс баар: Иннокентий Барашков, Христофор Потапов, Владислав Кривошапкин, Афанасий Вензель, Василий Коркин, Георгий Окороков, Виталий Эспек, Петр Константинов, Айсен Потапов, Роберт Окороков, Георгий Кычкин, Максим Заморщиков, Валентин Судинов, Юрий Сыромятников, Василий Никифоров, Федор Постников, Эдуард Григорьев.
Манна биир өйдөммөт түгэн баар, олохтоммут балаһыанньа быһыытынан, эдэрдэргэ Европа күрэхтэһиитин кыайыылааҕа Георгий Окороков – Красноярскайдааҕы турнирга быһа киириэхтээх этэ. Хамаанда сүрүн тренерэ Д.Тедеев испииһэгэр кини эмиэ баара. Ол эрээри, тоҕо эрэ Академия тустуутугар киирбит.
Саамай эрэнэр киһибит, соторутааҕыта Үрдүкү спортивнай маастарыстыба оскуолатын күрэхтэһиитигэр чөмпүйүөннээбит Эдуард Григорьев сэрэбиэй быһыытынан квалификацияҕа бастакы эргииргэ былырыыҥҥы Р.Дмитриев кэриэһигэр норуоттар икки ардыларынааҕы турнир кыайыылааҕа Жаргал Дамдиновы (Бурятия) кытта тустар буолбут. Манна хайалара кыайбыт салгыы эргииргэ Денис Карамчаковы (Хакасия) утары тахсыаҕа.
Сэрэбиэйи көрдөххө, бу ыйааһыҥҥа, сүрүннээн, эдэр бөҕөстөр кытталлар. Уопуттаах бөҕөстөртөн 28 саастаах биһиги Роберт Окороковпыт баар. Кини бастакы эргииргэ казах Ж.Иристаевтыын тустуоҕа.
Күүстээхтэртэн Россия эдэрдэргэ күрэхтэһиитин кыайыылааҕа Виктор Хан (Кемерово) уонна Солбон Тумэнбаяров, Алексей Мантатов диэн Бурятия маастардара бааллар.
Оттон 65 киилэҕэ барыта 35 бөҕөс киирсэр эбит. Бу ыйааһыҥҥа сахалар алтыалар. Ол курдук, үөһэ бөлөххө Алексей Иванов – Очир Дожиевы (Бурятия), Серафим Яковлев – Пурбоцырен Очировы (Хабаровскай), иккис бөлөххө Павел Яковлев – Тимур Серикбайы (Казахстан), Алексей Захаров – Дмитрий Зунтоевы (Иркутскай), Игорь Аммосов – Есет Дуйсеновы (Казахстан), Ларион Андреев – Роман Лигостаевы (Казахстан) кытта тустуохтара.
Манна ааттаах-суоллаах бөҕөстөрүнэн устудьуоннарга аан дойду чөмпүйэнээтин үрүҥ көмүс призера Тимур Айткуловы (Казахстан), Сибиир федеральнай уокуругун күүстээх бөҕөстөрө Дмитрий Зунтоевы (Иркутскай), Алексей Медведеви (Хакасия) уонна Д.П.Коркин турнирын кыайыылааҕа буола сылдьыбыт Менги Мортуй-Оолу (Тыва) ааттыахха сөп.
Санатан эттэххэ, бу турнир түмүгүнэн,у кыайыылаахтар тохсунньу 27-29 күннэригэр буолар Иван Ярыгин аатынан норуоттар икки ардыларынааҕы Гран-при турнирга кыттар быраабы ылыахтара.
Петр ПАВЛОВ.