Чумаков аатынан Киин дириэктэрин солбуйааччы Константин Чернов “Ковивак” уонна «Спутник V» туох уратылаахтарын быһааран кэпсээтэ.
edersaas.ru
Кини этэринэн, «КовиВак» урукку ньыманан оҥоһуллубут “цельновирионная инактивированная вакцина” диэн тииптээх вакцина. Ол эбэтэр, бу вакцина “өлөрүллүбүт” (дьайар кыаҕа сарбыллыбыт) SARS-CoV-2 вируска олоҕуран оҥоһуллар.
«Спутник V» буоллаҕына векторнай вакцина, вектор диэн коронавируһу “кистээн” миэстэтигэр тиэрдэр аденовирустары ааттыыллар. Бу икки аденовируска SARS-CoV-2 биир генын сорҕотун уган ыыталлар. Бу ген коронавирус S-белогун кодун илдьэ сылдьар.
Чернов этэринэн, Чумаков киинигэр оҥоһуллар вектронай вакциналар S-белок хойуутук үөскүүрүгэр дьайыылаах буоларыгар үлэлэрин туһаайаллар.
“Ковивак” вакцинанан быһыллыбыт эрдэ ыалдьыбатах дьоҥҥо чинчийээччилэр олус элбэх антитела үөскүүрүн кэтээн көрбүттэр. “Киһи этэ-сиинэ аҕыйах чаас иһигэр утары үлэлээн барар” диир исписэлиис.
“Өскөтүн киһи этин-сиинин патоген ханнык эрэ чааһын көрдөрдөхпүтүнэ, ол эрэ чаастарыгар харда биэрэр. Биһиги вакцинабыт үлэтигэр эт-сиин хас даҕаны тас белокка хардарар”, — билиэтээн этэр.
“Урукку ньыманан оҥоһуллар вируһу оҥоруу элбэх бириэмэни уонна үлэни эрэйэр, оттон дойдулар төһө кыалларынан түргэнник элбэх вакцинаны оҥоро сатаабыттара. Уонна кэммиэрчэскэй интириэс эмиэ оруоллаах”, — диир кини.
Америка Pfizer вакцината араак ыарыыны утары үлэлиир эмтэргэ олоҕуран оҥоһуллубут.
“Эмтиир уонна профилактикалыыр (вакцинопрофилактика) эмтэри оҥоруу туспа ньымаларга олоҕураллар, оттон Pfizer вакцинаны эмтиир ньымаҕа олоҕуран оҥоһуллубута баламат диэбэтэххэ аһары хорсун быһаарыы” — диир Чернов. Кини этэринэн мРНК-вакциналар эбии чинчийиинин билигин даҕаны эрэйэллэр.
«КовиВак» бу сыл олунньутугар көҥүллүүр регистрацияны ааспыта. Кулун тутартан киэҥ оҥоруу саҕаламмыта. Вакцина балыыһаларга тиийбитигэр Москва, Санкт-Петербург куораттарга баҕалаахтар элбэх буоланнар сурутуу хаста даҕаны тохтотулла сылдьыбыта. Эспиэрдэр урукку, өр кэмнэргэ тургутуллубут ньыманан оҥоһуллубут вакцинаҕа дьон эрэлэ ордук күүстээҕин бэлиэтээбиттэрэ.
Арассыыйаҕа барыта коронавируһу утары биэс вакцина регистрацияны ааспыта. «КовиВак» уонна «Спутник V» ураты өссө «Спутник Лайт», «ЭпиВакКорона» уонна «ЭпиВакКорона-H» вакциналар бааллар. Алтынньы ортотуттан Санкт-Петербурга «Бетувакс» диэн ааттаах саҥа вакцина клиническай тургутууга ылыллыбыта.
«Саха сирэ» хаһыат, edersaas.ru
Хаартыска sakha.gov.ru