«Эдэр саас» саайтыгар быһыыны ылыы боппуруоһугар эмчит санаатын таһаарабыт.
Алексей Аммосович Яковлев, СӨ Доруобуйа харыстабылын министиэристибэтин Суут-мэдиссиинэ экспертизатын бюротун начаалынньыга:
— Аан дойду үрдүнэн 7 миллиард 250 мөлүйүөн доза оҥоһуллубут. Итинтэн 3 миллиард 150 мөлүйүөн киһи быһыы толору кууруһун ылбыт. Арассыыйаҕа билигин ковиды утары быһыы 108 мөлүйүөн доза туруоруллубут. Онон 49,3 мөлүйүөн киһи толору быһыыны ылбыта биллэр. Бу вакцина саҥа, онон соччо үөрэтиллэ илик диир сыыha. Тустаах вакцина Бүтүн Арассыыйатааҕы электроннай регистргэ учуоттанар. Быһата, быһыыны ылбыттар регистрдэрэ оҥоһуллар. Онно ханнык фармацевтическай собуокка оҥоһуллан тахсыбыт вакцина ханнык эрэгийиэҥҥэ тиийбитэ, ханнык балыыһаҕа тиийэн, кимиэхэ бэриллибитэ регистргэ киирэр. Маны сэргэ бу быһыы ханнык киһи уопсай туругар бэрдэ суох дьайбытын (“побочное осложнение”) туһунан иһитиннэрии оҥоһуллар. Бу ковиды утары эрэ вакцина оннук регистрдэнэр. Быһыыны ылбыт киһи СНИЛС-э, төрөөбүт сыла, эр киһи эбэтэр дьахтар буолара барыта чопчу киирэр. Холобур, кирииби утары вакцинаҕа итинник регистрэ суох. Онон саамай үөрэтиллибитинэн, ис иһигэр киирэн үөрэтиллэринэн ковид вакцината буолар. Ону үөрэтэннэр, тута сөрөөн диэххэ, саҥа ньыма (методика) кэлэр. Оччоҕуна быһыыны биэрии схематын эмп үлэһитэрэ уларытан биэрэллэр. Билигин ити регистргэ 108 мөлүйүөн доза киирэн сыттаҕа дии. Толору быһыыны Арассыыйаҕа, үөһээ этэн аһарбытым курдук, 49,3 мөлүйүөн киһи ылла. Ол аата нэһилиэнньэ 34 бырыһыана.
Быһыыны ылыҥ диэн сүбэлиибин. Тоҕо диэтэххэ, быһыы тустаах дьаҥтан көмүскүүр, ыарыйдахха даҕаны ыарыы чэпчэкитик киирэр. Быһыыны ылбыт киһиэхэ киирбит вирус улахан аҥаарын быhыы кэнниттэн үөскээбит иммунитет нейтрализациялыыр, онон ыарыыны көбүтэр күүhэ аччыыр.
Инфекционнай ыарыыга сыстыы дозаттан тутулуктаах. “Минимальная инфицирующая доза” диэн баар, ол доза вирустарга араас буолар. Биир-икки вирус ыарыыны үөскэппэт, үксүгэр ити доза тыhыынчанан ааҕыллар. Холобур, Ухань вируһа быһа холоон 1000 вируснай эттик буоллаҕына, Дельта штамм 100, атыннык эттэххэ Дельта 10 төгүл күүстээх. Онон ыарыы элбээтэ диэххэ сөп.
Урут, билигин да уонна кэлин да саамай көдьүүстээх сэрэтэр, көмүскүүр ньыманан вакцинация уонна дьиэни салгылатыы буолаллар.
Вакцинация кэнниттэн үөскээбит иммунитет организмҥа киирбит вируhу нейтрализациялыыр.
Салгылатыы көмөтүнэн 1 куб. м. салгыҥҥа вирус эттигэ аҕыйыыр. Онон киhиэхэ киирэр вирус балачча аҕыйаан киһиэхэ сыстар дозаҕа тиийбэт буолар.
Мин бэйэм “Спутник-V” быһыыны ылбытым, этэҥҥэ аһарбытым.
Бэлэмнээтэ Женни Стрюкова
Хаартыска: Ил Түмэн саайтыттан