Арассыыйа үрдүнэн, ол иһигэр Саха сиригэр эмиэ, коронавируснай инфекциянан ыалдьыы уонна өлүү ахсаана намтаан иһэр. Ол курдук, ааспыт нэдиэлэҕэ 23 киһи “ковидтан” өлбүт.
Сэтинньи бүтэһик нэдиэлэтигэр 42 киһи тыына быстыбыта. Күһүн «төрдүс долгун» кэмигэр күҥҥэ уончалыы киһи тыына быстар кэмэ баара. Оттон пандемия саҕаланыаҕыттан, “ковидтан” өлүү ахсаана 1705 киһиэхэ тэҥнэстэ.
Ахсынньы 6 күнүгэр өрөспүүбүлүкэтээҕи суһал ыстаап салайааччытын солбуйааччы Ольга Балабкина брифинг кэмигэр иһитиннэрбитинэн, балыыһаҕа сытан 1301 киһи эмтэнэр, ол иһигэр 105 киһи ыарахан туруктаах (кинилэртэн 102 киһи быһыыны ылбатах), 17 киһи реанимацияҕа өлөр-тиллэр икки ардынан сытар.
Коронавируснай инфекцияны утары быһыы бастакы укуолун 480 415 киһи ылбыт, толору быһыыны 435 110 киһи (58,8%) ылбыт.
Ангелина Васильева, “Саха сирэ” хаһыат, edersaas.ru