«Талбан» биэриигэ эмтэммит киһи доруобуйатын хайдах чөлүгэр түһэриэн сөбүн туһунан ырытыы буолла.
edersaas.ru
Бу туһунан ХИФУ преподавателэ Ариан Тарасов билиһиннэрдэ. Исписэлиис бэлиэтээбитинэн, доруобуйатын чөлүгэр түһэрэр киһи сарсыарда аайы сытан эрэ былчыҥнарын хамсатан уһуктуон наада. Онтон туран төбөтүттэн саҕалаан, атаҕар тиийэ сэрээккэлиэхтээх. Күн аайы сибиэһэй салгыҥҥа хаамыы олус туһалаах. Үтүөрэн баран, тыынар уорганы сыыйа эрчийэр ордук эбит. Онуоха интэриниэккэ араас сүбэ да, дьарык да элбэх.
Ыараханнык ыалдьыбыт дьон «Абалаах» доруобуйаны чөлүгэр түһэрэр мэдисиинэ тэрилтэтигэр тиийэн икки нэдиэлэ эмтэнэллэрэ ордук эбит. Оттон чэпчэкитик аһардыбыт киһи күн аайы доруобуйатын туругуттан көрөн, тыҥатын чаастатык бэйэтэ эрчийэ сылдьара ордук.
Салгыы Ариан Тарасов: «Батсаапка олус элбэҕи сүбэлээн суруйаллар. Ону барытын ылынан иһэр наадата суох. Сорох өттө олус сэрэхтээх, киһиэхэ барытыгар сөп түбэспэт», — диэн бэлиэтээтэ. Оттон көрөөччүлэр: «Шаригы үрүөххэ сөп, умса сытан эрчиллэр ордук,» — диэн сүбэлээтилэр.
Ариан Тарасов: «Ыалдьа сылдьан хаамар наадата суох, ыарыыны бэргэтиэххэ, дьону сыһыарыахха сөп», — диэн көрөөччү ыйытыытыгар хоруйдаата.
«Үтүөрбүт дьон хаһан успуорт саалатыгар тиийэн дьарыктаныахха сөбүй?» диэн ыйыппыттарыгар, исписэлиис: «Биир ый ааспытын кэнниттэн успуорт саалаҕа эрчиллиэххэ сөп. Тириэньэр сүбэтинэн дьарыктанар, хамсанар ордук», — диэн сүбэлээтэ.
«Массаас туһалыыр дуо?» диэн ыйыппыттарыгар, биэрии ыалдьыта: «Массаас туһалыыр, ол эрээри анал сэртипикээттээх исписэлиис массаастыыра ордук» диэн хоруйдаата. Маны тэҥэ, кини «ковид» кэннэ баанньык сэрэхтээҕин, сүрэххэ кутталлааҕын бэлиэтээтэ.
Түмүккэ Ариан Тарасов: «Эрчиллии киһи аайы араас. Үтүөрбүт киһи сүрүннээн эт-хаан көһүйүүтүн уһугуннарыынан эрчиллэрэ ордук. Хааны сүүрдэр эрчиллиигэ болҕомтону ууруохха наада», — диэн эттэ.
Елена ПОТОЦКАЯ, «Саха сирэ» хаһыат, edersaas.ru