Коронавирус саҥа инфекциятынан ыалдьыбыт дьон олорор сирдэринэн поликлиникаларыгар ОМС полиһынан босхо диспансеризацияны барар бырааптаахтар.
Дириҥэтиллибит диспансеризация кэмигэр исписэлиистэр эмтэнээччи сүрэҕэр, тымырдарыгар, бүөрүгэр, тыҥатыгар уо.д.а. ис уорганнарыгар ааһан-араҕан биэрбэт ыарыылара бэргээбитин бириэмэтигэр быһаарыахтарын сөп.
edersaas.ru
Диспансеризацияҕа 18 саастарын ааспыт дьон кыттар кыахтаахтар. Бастатан туран, исписэлиистэр ааһан-араҕан биэрбэт ыарыылаах итиэннэ ковид орто уонна ыарахан көрүҥүнэн ыалдьыбыт дьон доруобуйаларын көрдөрүнэллэригэр сүбэлииллэр. Ону таһынан ыалдьыбытын туһунан туох да сибидиэнньэтэ суох, холобур, бырааһы ыҥырбакка эрэ дьиэҕэ эмтэммит дьон эмиэ диспансеризацияны ааһыахтарын сөп.
Диспансеризацияны олорор сиргинэн поликлиникаҕа барыаххын сөп. Онуоха поликлиника эбэтэр «Судаарыстыбаннай өҥөлөр» федеральнай портал нөҥүө суруйтарыахха сөп.
Диспансеризация икки түһүмэхтээх. Бастакы түһүмэҕи ковидынан ыалдьан үтүөрбүтүн кэннэ 60 хонугунан барыахтаах.
Бастакы түһүмэххэ киирэллэр:
— Хаан уопсай уонна биохимическай анаалыһа;
— хаан кислородунан туолуутун мээрэйдээһин
– түөс килиэккэтин уорганнарыгар рентгенография (биир сыл иһигэр оҥорторботох буоллаҕына);
— спирометрия эбэтэр спирография;
хааҥҥа Д-димер концентрациятын быһаарыы;
– терапевка көрдөрүнүү
Бастакы түһүмэх кэнниттэн, наада буоллаҕына, эмтэнээччини иккис түһүмэххэ ыытыахтарын сөп.
Онно кини оҥорторор:
— тыҥаҕа көмпүүтэр томографиятын;
— эхокардиографияны;
— тымырдарга дуплекснай сканированиены;.
Диспансеризация өрөспүүбүлүкэ мэдиссиинискэй тэрилтэлэригэр барыларыгар ыытыллар. Диспансеризацияҕа сыһыаннаах ыйытыыларгытын быһа сибээс 88001001403 нүөмэринэн эбэтэр бэйэҕит поликлиникатыгар, оройуоннааҕы балыыһаҕа эрийэн биэриэххэ сөп.
Надежда ЕГОРОВА, «Саха сирэ» хаһыат, edersaas.ru