Доруобуйа Маны аах

Коронавирус кэннэ диспансеризация

Коронавируснай инфекциянан ыалдьан үтүөрбүт дьон доруобуйаларын туругун дириҥник чинчийэн көрөр-истэр диспансеризацияны ааһыахтарын сөп.

Манна сүрэх-тымыр, тыҥа, быар-бүөр, о.д.а. уорганнар ыарыыларын булан ылыахтарын сөп. Ордук олоҕурбут ыарыылаах уонна “ковидынан” ыараханнык ыалдьыбыт дьоҥҥо маннык көрүү наадалаах. Босхо диспансеризацияны 18 сааһын туолбут киһи олорор сиринэн сыһыарыллыбыт поликлиникаҕа барыан сөп.

Диспансеризацияҕа поликлиникаҕа баран, эбэтэр, “Госуслуги” портал нөҥүө суруйтарыахха сөп. “Ковидынан” ыалдьыбыт кэннэ 60 күн ааспыт буолуохтаах.

Бастатан туран, тугу бэрэбиэркэлииллэр?

— уопсай уонна биохимическэй хаан анаалыһа (холестерин, липопротеин, креатинин, С-реактивнай белок, АЛТ, АСТ, лактатдегидрогеназа);

— хаан кислородунан хааччыллыытын;

— тыҥаны рентгеннээн көрүү (сыл устата оҥоһуллубатах буоллаҕына);

спирометрия, эбэтэр спирография;

— хаан Д-димерын быһаарыы;

— терапевт-быраас көрүүтэ.

Бу анаалыстар организмҥа иһии, кэһиллии баарын булаллар. Быраас маны көрөн, салгыы эмтэнэргэ ыытар. Наада буоллаҕына, иккис түһүмэх ыытыллар. Манна тыҥаны көмпүүтэр томографиятыгар түһэрэллэр, эхокардиографияны, атах тымырдарыгар «дуплексное сканирование» диэн процедураны оҥороллор.

Доруобуйа харыстабылын министиэристибэтэ иһитиннэрбитинэн, ковид” кэннэ дириҥэтэн көрүүнү-истиини мэдиссиинэ бары тэрилтэлэригэр оҥороллор.

Ыйытыылаах буоллаххытына, 88001001403 нүөмэргэ, эбэтэр, сыһыарыллыбыт поликлиникаҕытыгар, улуустааҕы киин балыыһаҕа эрийэн, сиһилии билсиэххитин сөп.

Ангелина Васильева, “Саха сирэ” хаһыат, edersaas.ru

Хаартыска: tass.ru

0
0
Telegram @edersaas20