Дьокуускай куорат таһынааҕы Маҕан бөһүөлэгин «Котрус» бааһынай хаһаайыстыбата сирин сыллата кэҥэтэн, билигин 396 гектар бааһынаҕа үлэлиир.
«Саха сирэ» хаһыат, edersaas.ru
Хаһаайыстыба быйыл бурдугу 300 гектарга, сүөһү сиир култууратын 60 гектарга ыһар, хортуоппуйу 30 гектарга, оҕуруот аһын 6 гектарга олордор былааннаах. Бу күннэргэ уон икки киһилээх биригээдэни туруоран, сиик саптарыытын бүтэрэн, ыһыытын саҕалаата.
Күн бүгүҥҥү туругунан, бурдугу 40 гектарга ыста, хортуоппуйу 10 гектарга олорто. Ол курдук, Кырдьаҕас Маҥан бааһынатыгар 11 гектар сиргэ эбиэс «Виленскэй» дэнэр суперэлита суордун ыспыттар, Эмпэ кытыл бааһынатыгар икки гектарга хортуоппуй «Вармас» элита суордун олордубуттар, аны 28 гектарга хас да суорду булкуйа олордуохтаахтар.
— Былырыыҥҥыга тэҥнээтэххэ, быйыл күн-дьыл туруута үчүгэй, – диир хаһаайыстыба баһылыга Екатерина Васильевна. – Ол эрээри, айылҕа диэн айылҕа, халлааммыт биир да чаас иһигэр уларыйа охсуон сөп. Инньэ гынан, бачча туран биэрбит күнү-дьылы өрүсүһэн, бурдукпутун да, хортуоппуйбуутн да хаачыстыбалаахтык ыһарга кыһаллан үлэлиибит.
Бырабыталыстыба Бэрэссэдээтэлэ Денис Белозеров уонна тыа хаһаайыстыбатын миниистирэ Александр Атласов бу хаһаайыстыбаҕа сылдьан ыһыы хаамыытын, күннээҕи үлэни-хамнаһы көрдүлэр-иһиттилэр. Санатан эттэххэ, өрөспүүбүлүкэ үрдүнэн быйыл бурдук 9 379 гектарга, сүөһү сиир култуурата 30 283 гектарга ыһыллыахтаах, хортуоппуй 7 583 гектарга, оҕуруот аһа 1 778 гектарга олордуллуохтаах. Сөп буолар сиэмэ, уоҕурдуу уонна уматык баар. Ыһыы үлэтигэр бүддьүөттэн 202,1 мөл. солк көрүллүбүтүттэн, 154 мөл. солк тустаахтарга тиэрдиллибитэ, ордуга бу ый бүтүүтэ ыытыллыахтаах. Сааскы халаан этэҥҥэ ааста, күн-дьыл бэркэ турар. Хаһаайыстыбалар ыһыы үлэтигэр көхтөөтүк туруннулар диэн тыа хаһаайыстыбатын министиэристибэтэ иһитиннэрэр.
Раиса Сибирякова, «Саха сирэ» хаһыат, edersaas.ru