Коронавирус вакцинатын күһүҥҥүттэн биэрэн саҕалыахтарын сөп. Вакцинация бэриллиитэ 6-9 ый устата уһуур чинчилээх. Ол туһунан Н.Ф. Гамалея аатынан Национальнай эпидемиология уонна микробиология киинин дириэктэрэ Александр Гинцбург “Жить здорово” биэриигэ иһитиннэрбитэ.
Вакцинаны (быһыыны) бу кииҥҥэ оҥорбуттар уонна үлэһиттэр бэйэлэригэр киллэрэн, кэтээн көрбүттэр, чинчийбиттэр. Онон буортута суох диэн эт бэйэлэринэн дакаастаабыттар.
— Нэһилиэнньэ барыта биир кэмҥэ ылар кыаҕа суох. Бастакы уочарат вакцинаны коронавируһу кытары алтыһар дьон: быраастар, волонтердар, таксистар, оптуобустар суоппардара, аптека үлэһиттэрэ, атыыһыттар, уо.д.а. ылыахтара. Ол кэнниттэн маассабай вакцинация саҕаланыан сөп, — диэн Гинцбург кэпсээтэ.
Билигин аан дойду үрдүнэн коронавирус утары вакцинаны (быһыыны) оҥорон таһаарарга сүүһүнэн лабораториялар үлэлииллэр. Килиниичэскэй чинчийиини оҥорууну 9 научнай киин саҕалаата. Арассыыйаҕа маннык килиниичэскэй чинчийии бэс ыйыгар саҕаланыаҕа. Күһүн, тумуу элбиир кэмигэр, ыарыы иккис “долгуна” кэлиэ диэн сабаҕалыыллар.
Санатар буоллахха, Доруобуйа харыстабылын аан дойдутааҕы тэрилтэтэ (ВОЗ) иһитиннэрбитинэн, вакцината суох пандемияны кыайар кыах суох.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.