Бүгүн өрөспүүбүлүкэҕэ коронавирус тарҕаныытын туругун туһунан өрөспүүбүлүкэ суһал ыстаабын салайааччытын солбуйааччы Ольга Балабкина брифинэ буолла.
Уопсайынан ыллахха, балаһыанньа ыгым соҕус. Кини этиититтэн тугу болҕойуохха сөбүй? Коронавирустан ыалдьыбыт дьон өлүүлэрэ күн аайы тахса турар. Бу олус кутталлаах көстүү. Аны туран тыа сиригэр Дьокуускай куораттан уонна атын да сирдэртэн ыалдьыттар кэлиилэрэ ыарыы тарҕаныытыгар төрүөт буолбут. Онон ыалдьыт күүтэр дьон коронавируһу утары быһыы ыллахтарына эрэ табыллар эбит.
Суһал ыстаап салайааччытын солбуйааччы этэринэн, ааспыт сууккаҕа 86 ыалдьыбыт киһи бэлиэтэммит. Киин куораппытыгар ыарыы аччаабыт диэххэ сөп. Дьокуускайга — 55. Алдаҥҥа уонна Өймөкөөҥҥө элбэх киһи ыалдьыбыт. Туһааннааҕынан 5 уонна 4. Ону сэргэ Амма, Мэҥэ Хаҥалас, Хаҥалас улуустарыгар — 3-түү, Булуҥ, Бүлүү, Горнай, Мииринэй, Нерюнгри, Уус Алдан оройуоннарыгар — 2-лии. Муома улууһугар 1 ыалдьыы бэлиэтэммит.
Үөһээ Бүлүү, Алдан оройуоннарын МТ коронавирус туругун ырыппыттар. Маныаха санитарнай-эпидемиологическай ирдэбили тутуһуу уонна ыалдьыт кэлэрэ күүтүллэр буоллаҕына, быһыыны ылыы ирдэммит.
Хат дьахталлар ыалдьаллара тохтооботох. Онон хат дьахтар ыалдьыбатын туһугар чугастааҕы дьоно эмиэ быһыы ылыахтаахтар диэтэ Ольга Балабкина.
Кини салгыы бэлиэтээбитинэн, «Вектор» институтуттан 40 тыһ. доза быһыы кэлбит. Оройуоннарга түҥэтиллэр. Онон Эпиваккоронаны ылыан баҕалаахтар оройуоннар кииннэригэр нэдиэлэ устата кэлэн быһыы ылаллара күүтүллэр. Куйаас күннэр сатыылаабыттарынан бэйэ туругун кэтээн көрүү ирдэнэрин эттэ.
Дьэ, билиҥҥи балаһыанньа итинник. Этэҥҥэ буолуҥ!
Бэлэмнээтэ Женни Стрюкова
Хаартыска: интэриниэттэн