Ыам ыйын 15 күнүнээҕи туругунан, суукка иһигэр коронавируһунан ыалдьыбыт өссө 36 киһи үтүөрэн, балыыһаттан таҕыста. Ил Дархан Айсен Николаев бүгүн ыараханнык ыалдьыбыт 85 саастаах пациентка үтүөрэн, балыыһаттан тахсан эрэр диэн үөрүүлээх сураҕы иһитиннэрдэ. Ол биһиги быраастарбыт үчүгэй үлэлэрин бигэргэтэр.
edersaas.ru
“Доверие” чааһынай пансионат дириэктэрэ Михаил Готовцев:
— Кинини балыыһаттан таһаара иликтэр, бу нэдиэлэ бүтэһигин диэки таһаараллара буолуо. Эбии көмпүүтэр томографиятыгар түһэрэн, доруобуйатын туругун барытын толору бэрэбиэркэлээн баран, таһаарыахпыт дииллэр, туруга үчүгэй. Билиҥҥитэ пансионаттан хантаактаах буолан, инфекционнай балыыһаҕа уонна обсерваторга барыта 22 кырдьаҕас, 3 үлэһит сыталлар, туруктара этэҥҥэ, — диэн иһитиннэрдэ.
Санатар буоллахха, ыам ыйын 2 күнүгэр “Доверие” пансионат олохтоохторуттан 9 киһи коронавируһунан ыалдьан, инфекционнай балыыһаҕа киирбитэ. Үлэһиттэр анаалыстара бигэргэммэтэҕэ.
Өрөспүүбүлүкэ үрдүнэн кырдьаҕастар, инбэлииттэр дьиэлэригэр, психоневрологическай интэринээттэргэ, социалнай-ребаилитационнай кииннэргэ муус устар ый саҥатыттан толору харантыын эрэсиимэ биллэриллибитэ.
Билигин 45 тэрилтэҕэ 3112 киһи толору харантыыҥҥа олорор. Кинилэри 790 үлэһит күнүстэри-түүннэри көрөр-истэр. 4 нэдиэлэ буола-буола солбуйсаллар, тэрилтэттэн киирэр-тахсар бырааптара суох.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн.