Коронавирустан ордук эмсэҕэлээбит урбаан эйгэтин субъектарын испииһэгэ бигэргэннэ

Саха Өрөспүүбүлүкэтин Экономика уонна социальнай туруктаах буолуу бигэтик сайдарын хааччыйар хамыыһыйата саҥа коронавирус дьаҥа (COVID-19) тарҕаныытыттан ордук улахан эмсэҕэлээһини ылбыт орто уонна дьоҕус урбаан эйгэтин субъектарын испииһэгин бигэргэттэ.

edersaas.ru

Ол туһунан докумуону Хамыыһайаҕа урбаан, эргиэн уонна туризм миниистирэ Ирина Высоких киллэрдэ. Миниистир бэлиэтииринэн, испииһэк тустаах министиэристибэлэр уонна бизнес эйгэтин этиитинэн оҥоһуллубут федеральнай испииһэккэ сөп түбэһиннэриллибит. Онно 17 эйгэ киллэриллибит.

Санатан эттэххэ, Арассыыйа Бырабыыталыстыбата муус устар саҥатыгар пандемия охсуутугар ордук улахан эмсэҕэлээһини ылбыт салаалар испииһэктэрин оҥорбута. Билиҥҥи туругунан Бырабыыталыстыба бигэргэппит испииһэгэр саҥа коронавирус дьаҥыттан улаханнык эмсэҕэлэбит уон биир үлэ көрүҥэ киирэ сылдьар. Бу туһунан Ил Дархан уонна Бырабыыталыстыба пресс-сулууспата иһитиннэрэр.

Раиса Сибирякова, «Саха сирэ» хаһыат, edersaas.ru