Коронавируһунан ыалдьан үтүөрбүт дьон доруобуйаларын чөлгө түһэрэллэригэр элбэх бириэмэ, сыра наада буолар. Кинилэр көмөҕө наадыйаллар. Тоҕо диэтэр, уодаһыннаах вирус организм мөлтөх сирдэринэн киирэн, олоҕурбут ыарыылары көбүтэн, уорганнарга, сүрүн систиэмэлэргэ охсор. Ону ситэ эмтиэххэ, организм чөлгө түһэригэр көмөлөһүөххэ наада.
Саха сиригэр Мэҥэ Хаҥаласка баар Абалаахха өрөспүүбүлүкэтээҕи мэдиссиинэ реабилитациятын киинигэр бу сайыҥҥыттан коронавируһунан ыалдьыбыт дьону чөлгө түһэрэллэр. Үс ый иһигэр 90-тан тахса киһи ситэри эмтэнэн, доруобуйаларын туругун тупсаран таҕыста.
Абалаахха ыараханнык сэбиргэхтэтэн ыалдьыбыт, ИВЛ аппараатыгар сыппыт, доруобуйалара улаханнык эмсэҕэлээбит дьон киирэр кыахтаахтар. Реабилитация кууруһа 14-17 күн устата буолар. Манна эмтиир физкултуура, физио-эмтээһин, массаас, механотерапия, бадараанынан эмтэнии, тыыныы гимнастиката, о.д.а. киирэр.
Бу кииҥҥэ хайдах киириэххэ сөбүй? Поликлиника терапевт бырааһа анаан ыытар, эбэтэр эмтэммит балыыһаттан быһа ыытыахтарын сөп.
Маны тэҥэ, Дьокуускайга «Чэбдик» санаторийга эмиэ коронавируһунан ыалдьыбыт дьоҥҥо реабилитация үлэтэ ыытыллар.
Ангелина Васильева, “Саха сирэ” хаһыат, edersaas.ru
Хаартыска: ykt.ru