Коронавирустаах дьоҥҥо амбулаторнай киин аһыллыаҕа...
Олох-дьаһах

Коронавирустаах дьоҥҥо амбулаторнай киин аһыллыаҕа

Дьокуускайдааҕы 3-с №-дээх балыыһа иһинэн коронавируһу билэргэ, суһаллык буларга амбулаторнай киин арыллан эрэр. Ол эбэтэр, ыалдьыбыт киһи биир сиргэ баран, ПЦР анаалыһы туттарар, көмпүүтэр томографиятыгар түһэр уонна бырааска эмтэниини анатар.

Киин күнүстэри-түүннэри үлэлиэҕэ. Кэлэр икки нэдиэлэ иһинэн аһыллара былааннанар диэн СИА иһитиннэрэр. Билигин дьиэтин-уотун бэлэмнии, өрөмүөннүү сылдьаллар.

Бу иннинэ ыалдьыбыт киһи тыынара ыараабытын сибикилээтэҕинэ, көмпүүтэр томографиятыгар баран түһэрэ, онтон дьиэтигэр баран, быраастары кэтэһэрэ. Сэбиргэхтэппитэ бигэргэннэҕинэ, лабораннар баран, анаалыс ылаллар, онтон быраас баран, эмтэниини аныыра. Оттон ПЦР анаалыһын хас да күн устата кэтэһэргэ тиийэллэрэ.

Биһиги чинчийииттэн саҕалаан, эмтэниигэ тиийэ көрдөрүнүү хаамыытын уларыттыбыт. Барытын биир сиргэ биэрэр, көрдөрөр, эмтэниини анатар кыах баар буолуо. Онон кэтэһии бириэмэтин кылгаттыбыт. Биһиэхэ көмпүүтэр томографията, килиниичэскэй-диагностическай лаборатория, быраастар – барыта биир сиргэ бааллар. Пациент биир күн иһигэр, биир сиргэ анаалыһы туттаран, түмүгүн билэн, эмтэниини анатан барыаҕа, — диэн Дьокуускайдааҕы 3-с -дээх балыыһаҕа КТ сэбиэдиссэйэ Владислав Гатилов кэпсээтэ.

Амбулаторнай киин 3-с -дээх балыыһа иһинэн тэриллэр. Роспотребнадзор ирдэбилинэн, “ыраас” уонна “кирдээх” зоналарга арахсар, үлэһиттэр уонна пациеннар тус-туспа аанынан киирэллэр. Түүннэри-күнүстэри 24 үлэһит дьуһуурустубалыаҕа.

Дьэ, үөрүүлээх сонун! Коронавируһунан ыалдьыбыт дьон чааһы-чааһынан уочаракка олорбокко, таксинан төттөрү-таары сылдьыбакка, хас да күн кэтэспэккэ, биир сиргэ, биир күнүнэн билиннэҕинэ, эмтэнии суһаллык саҕаланнаҕына, Дьокуускайга ыалдьыбыт дьон ахсаана аҕыйыа диэн эрэнэбит.

Ангелина Васильева, “Саха сирэ” хаһыат, edersaas.ru

Хаартыска: интэриниэттэн.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

четыре × один =