Коронавируска сутуллуу хас биирдии түгэнин оройуон баһылыктара хонтуруоллуохтара
Бүгүн, ыам ыйын 14 күнүгэр, Саха сирин баһылыга Айсен Николаев муниципальнай тэриллиилэр уонна куорат уокуруктарын баһылыктара кыттыылаах суһал ыстаап мунньаҕын ыытта. Бу туһунан өрөспүүбүлүкэ Ил Дарханын пресс-сэкирэтээрэ Афанасий Ноев иһитиннэрдэ.
Ил Дархан өрөспүүбүлүкэҕэ ковид дьаҥынан ыалдьыы ахсаана үрдээбитигэр болҕомтону туһаайда.
Айсен Николаев эргиэн тэрилтэлэрин өттүттэн хааччахтыыр миэрэлэри тутуспаттарын, уопсастыбаннай сирдэргэ уонна тырааныспарка дезинфекция мөлтөхтүк ыытылларын, маасканы кэтиини уонна социальнай тэйиччи буолууну тутуспаттарын эттэ.
Ил Дархан бары хааччахтыыр миэрэлэри булгуччу толорууну ирдээтэ. Оройуоннарга уонна Дьокуускайга баар суһал ыстааптар эпидбалаһыанньаны хонтуруоллуохтаахтар.
Баһылык быһыыны ылыы булгуччулааҕын уонна дьон быһыыны ылыыларын тэтимин аччаппат наадатын ыйда.
Бүгүн өрөспүүбүлүкэҕэ 117 тыһыынча киһи бастакы быһыыларын ыллылар, ол иһигэр 60 саастарын ааспыт 30 тыһыынча кэриҥэ киһи. Иккис быһыыларын 97 тыһыынчаттан тахса киһи ылбыт. Кэлбит вакцина 86 бырыһыана туһаныллыбыт.
Бүлүү, Мэҥэ Хаҥалас уонна Таатта улуустарын баһылыктара уустук эпид балаһыанньа кэмигэр ыытар үлэлэрин билиһиннэрдилэр.
Айсен Николаев биирдиилээн тахсар түбэлтэлэри булгуччулаахтык хаптатарга болҕомтону тарта. Тоҕо диэтэххэ, түгэни мүлчү туттахха коронавируска сутуллуу биир түгэниттэн уонча саҥа бэлиэтэнэр.
Саха сирин вице-премьерэ Ольга Балабкина киин куоракка бастаан ыарыы үрдээһинэ аны оройуоннарга сыҕарыйбытын эттэ.
Маай бырааһынньыктарын өрөбүллэригэр устудьуоннар айаннааһыннара бэлиэтэнэн, оройуоннарга ыарыы үрдээһинигэр тириэртэ. Вице-премьер суһал ыстааптар миэстэтигэр дьон кэлиитин-барыытын көрөллөрүгэр ыҥырда.
СӨ кылаабынай санитарнай бырааһа Маргарита Игнатьева офис үлэһиттэрин ортолоругар ыарыы тэнийбитин бэлиэтээтэ. Үлэлиир саастаах 30-49 саастаахтар ыалдьаллар. Саҥа ыалдьыы түгэнэ таҕыстаҕына хантаактаах дьону буларга эттэ. Маассабай тэрээһиннэри ыытыыттан туттунарга сүбэлээтэ, ордук оскуола кэлэктииптэригэр.
Бүгүн суһал ыстааптар иннилэригэр биир сорук турар – коронавирус дьаҥа тарҕаныытын тохтоторго уонна өрөспүүбүлүкэҕэ эпидбалаһыанньаны туруктаах оҥорорго.
Мунньаҕы түмүктүүрүгэр Айсен Николаев оройуон уонна куораттар суһал ыстааптарыгар балаһыанньа мөлтөөһүнүгэр түргэнник дьаһанарга, тэтимнээхтик үлэлииргэ, быһыыны ылыы тэтимин аччаппат туһунан ыҥырда.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын Дьаһалтатын пресс-сулууспата
Андрей Сорокин хаартыската
Бэлэмнээтэ Женни Стрюкова.