Коронавирустан сылтаан, биржаҕа ньиэп-гаас, тырааныспар хампаанньаларын аахсыйатын сыаната түһэ турар.
edersaas.ru
Ол оннугар химическэй хампаанньалар аахсыйалара үрдээтэ. Билигин аан дойду үрдүнэн 35 тахса лаборатория уонна институт өркөн өйдөөхтөрө коронавирус утары вакцина айарга күрэхтэһэллэр. Ким бастакы сыстыганнаах ыарыыны кыайар вакцинаны оҥорбут ол тута байа түһэр, ону атыылаһаары мөлүйүөнүнэн дуоллары кутуохтара.
Доруобуйа харыстабылын аан дойдутааҕы тэрилтэтэ ВОЗ этэринэн, вакцина оҥорорго ортотунан балтараа сыл барыаҕа. Арассыыйаҕа Новосибирскай учуонайдара «Вектор» вирусологическай кииҥҥэ вакцинаны 11 ыйынан бэлэмнээн таһаарыахтарын сөбүн туһунан иһитиннэрбиттэрэ. Ити кэмҥэ клиническэй чинчийии, вакцина кыылга, киһиэхэ хайдах дьайарын тургутан көрүү киириэҕэ. АХШ, Германия, Кытай биофармацевтическай хампаанньалара вакцинаны оҥорон, сотору кэминэн дьоҥҥо тургутуохтаахтар.
Оксфорд университетын учуонайдара вакцинаны дьоҥҥо тургутан көрөөрү 18-55 диэри саастаах чөл доруобуйалаах уонна баҕа өттүнэн кыттыан баҕалаах дьону ыҥырдылар. Кинилэргэ быһыы туруоран, ол хайдах дьайарын алта ый кэтээн көрүөхтэрэ. Ол туһунан РИА-Сонуннара иһитиннэрэр https://ria.ru/20200327/1569218676.html
Түгэх өйдөөх дьон этэринэн, коронавирус ити хампаанньалары байытаары лабораторияҕа соруйан оҥоһуллубут искусственнай вирус буолуон сөп.
Хаартыска mk.ru
«Саха сирэ», edersaas.ru