Ил Дархан Айсен Николаев тохсунньу 11 күнүгэр ыытыллыбыт суһал ыстаап мунньаҕар, өрөспүүбүлүкэ эпидемиологическай туругун туһунан кэпсээтэ итиэннэ коронавируһу утары үлэҕэ саҥа соруктары туруорда.
Айсен Николаев билиҥҥитэ өрөспүүбүлүкэҕэ эпидемиологическай балаһыанньа арыый да буолбутун эттэ. Ол гынан баран, кэккэ оройуоннарга, ол иһигэр Алдаҥҥа, Мэҥэ Хаҥаласка ыалдьааччы ахсаана элбии турарын иһитиннэрдэ. Маны таһынан Бүлүү, Ньурба, Мииринэй, Ленскэй оройуоннара ураты хонтуруолга сылдьаллара бэлиэтэннэ.
Өрөспүүбүлүкэ баһылыга суһал ыстаап чилиэннэригэр, коронавируһу утары охсуһууга үлэлии сылдьар структураларга махталын биллэрдэ. Роспотребнадзор чахчыларынан, ахсынньыга биир нэдиэлэҕэ COVID-19 дьаҥыгар хаптарыы 1,5 тыһыынча түбэлтэтэ, онтон саҥа үүммүт сыл иккис нэдиэлэтигэр 864 түбэлтэ бэлиэтэммит. Бырааһынньык кэмнэригэр ыалдьааччы ахсаана 40% намтаабыт. Ол гынан баран анаалыһы ылыы ахсаана аҕыйаабыт. Холобур, ахсынньы 31 күнүттэн тохсунньу 10 күнүгэр диэри лабораториялар 12 тыһыынча тест оҥорбуттар.
Чугастааҕы сыл сүрүн соругунан «маассабай» вакцинациялааһын диэн Айсен Сергеевич тоһоҕолоон бэлиэтээтэ. Коронавируһу утары быһыыны биэрии атын вакцинациятааҕар ураты. Онон вакцинаны ылар киһи бэрэбиэркэни ааһыахтааҕын таһынан, анкета оҥоһуллан федеральнай реестрга киллэриллиэхтээх.
Ил Дархан быһыыны оҥорорго быстах кэмнээх пууннары тэрийии туһунан эттэ. Маны таһынан волонтердар өҥөлөрүнэн туһанан, кинилэр анкетаны оҥорууга көмөлөһүөхтэрин сөбүн бэлиэтээтэ.
Доруобуйа харыстабылын миниистирэ Елена Борисова мэдиссиинискэй тэрилтэлэр вакцина кэлиитигэр бэлэм олороллорун дакылааттаата. Анал холодильнай уонна морозильнай камералар бэлэмнэр.
Айсен Николаев тохсунньу 15 күнүнэн Саха сиригэр коронавирус инфекцията тарҕаныытын сэрэтэр хааччахтааһын миэрэлэрин туһунан ыйаах болдьоҕо бүтэринэн, суһал ыстаапка саҥа этиилэри киллэрэллэригэр сорудахтаата.
СӨ Ил Дарханын уонна Бырабыыталыстыбатын пресс-сулууспата