Арассыыйаҕа коронавируснай инфекция тарҕаныытын коэффициена пандемия саҕаланыаҕыттан муҥутуур намыһах көрдөрүүтүн ситистэ. Ол курдук, тохсунньу 4 күнүгэр бу коэффициент 0,83-кэ тэҥнэстэ.
Ыалдьыы ахсаана эмиэ эмискэ намтаата – уонча күн иһигэр үс төгүл аҕыйаата. Холобур, Саха сиригэр тохсунньу 5 күнүгэр 63 киһи “ковидынан” ыалдьыбыт. Оттон ахсынньы саҥатыгар күҥҥэ 200-тэн тахса киһи, саҥа сыл бастакы күнүгэр 100-чэкэ киһи ыалдьар этэ.
“Ковид” тарҕаныытын коэффициена диэн — биир ыалдьыбыт киһи булуллан, балыыһаҕа киириэр, эбэтэр, дьиэҕэ хааччахтанан олоруор диэри хас киһини сыһыарарын ааҕаллар. Бу коэффициены хааччахтыыр миэрэлэри киллэрэргэ-устарга туһаналлар.
Саамай элбэх ыалдьааччылаах эрэгийиэннэргэ бу көрдөрүү 1-тэн намыһах буолла. Москва уобалаһыгар – 0,94, Санкт-Петербурга – 0,88, Саратовскай уобаласка – 0,87, Пермскэй кыраайга – 0,86, Москваҕа – 0,85, Красноярскай кыраайга – 0,81. Саамай намыһах коэффициент – Самара уобалаһыгар (0,64) бэлиэтэммит.
Онон, сотору кэминэн хааччахтыыр миэрэлэр уһуллуохтарын сөп.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru