Бүгүн, ыам ыйын 19 күнүгэр, Ил Дархан Айсен Николаев ыыппыт брифинигэр ааспыт суукка иһигэр өссө 45 киһи коронавируһунан ыарыйда диэн иһитиннэрдэ.
Бу кэмҥэ өрөспүүбүлүкэҕэ ыалдьыбыт дьон уопсай ахсаана 914 киһиэхэ тэҥнэстэ. Саҥа ыалдьыбыт дьонтон 35 киһи – Дьокуускай куоракка, 11 киһи – улуустарга.
— Нам улууһун Салбаҥ нэһилиэгэр элбэх дьон ыалдьыбыта уонна хантаактаспыта долгутар. Онно билигин Дьокуускайтан медиктэр биригээдэлэрэ тиийэн үлэлиир. Ыалдьыбыт дьону сорохторун санавиациянан киин куоракка киллэрдилэр, сорохтор улуустааҕы киин балыыһаҕа эмтэнэллэр. Хантаактаспыт дьон быһаарыллаллар, “изоляцияҕа” олороллор.
Улуустарга маннык балаһыанньа тахсыбатын туһугар, олохтоохтор да, дьаһалта да болҕомтолоох буолуохтарын наада. Ыалдьыбыт киһи тута бырааска көрдөрүнүөхтээх, ол ыарыы дириҥии илигинэ, чэпчэкитик эмтэнэригэр көмөлөөх уонна киэҥник тарҕамматын мэктиэлиир, — диэн Айсен Сергеевич эттэ.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн