Коронавирус: суһаллык дьайар бөлөх тэрилиннэ

Бөлөххө киир:

Өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрбитинэн, балаҕан ыйыгар “суһал көмө” уонна поликлиникалар төлөпүөннэригэр көмө көрдөөн эрийии хас да төгүл эбиллибит.

edersaas.ru

Холобур, биир мэдиссиинэ тэрилтэтин төлөпүөнүгэр бэҕэһээ, биир эрэ күн устата 25 тыһыынча киһи эрийбит. 20 оператор тэҥинэн үлэлии олорор эрээри, бачча элбэх ыҥырыыны тута ыла охсубаттар, 30-40 мүнүүтэ кэтэһиннэриилээх буолар. Ол да буоллар, социальнай ситимнэргэ “суһал көмө” уонна поликлиникалар төлөпүөнү ылбаттарын туһунан суруйуулар элбээтилэр.

Бүгүҥҥүттэн Ил Дархан быһаарыытынан, өрөспүүбүлүкэтээҕи суһал ыстаап иһинэн суһаллык дьайар оһуобай бөлөх баар буолла. Кинилэр социальнай ситимнэргэ тарҕанар иһитиннэриилэри кытары быһаччы үлэлэһиэхтэрэ. Биһиги биир да иһитиннэриини болҕомтото суох хаалларбаппыт. “Суһал көмө” оператордара куруубайдаабаттар, быһааран биэрэллэр, ол эрээри, хас биирдии ыҥырыы барыта кинилэр көмөлөрүгэр наадыйбат. Сорох ыҥырыылар поликлиника көрүүтүгэр барыахтаахтар.

Холобур, икки күн иһигэр “балыыһаҕа киллэриҥ, миэрэтэ ылыҥ” диэн 5 ыксаллаах иһитиннэриини кытта үлэлээбиппит түмүгэр, 2 эрэ иһитиннэриинэн балыыһаҕа киллэрэргэ наадыйаллар эбит диэн быһаардыбыт. Атын түгэннэргэ быһаарар-өйдөтөр үлэни эрэ эрэйэр түбэлтэлэр эбит.

Ол эрээри, маннык иһитиннэриилэринэн быһаччы үлэлээн, ыксаллаах боппуруостары, паникалыыр настарыанньаны уһулар, уоскутар наада. Тоҕо диэтэр, күһүн тумуу, кириип элбээбитэ, ковид балаһыанньатын иннэ-кэннэ биллибэтэ барыта үгүс ыйытыылары үөскэтэллэр. Биһиги балыыһаларбыт, быраастарбыт кыаҕы таһынан үлэлии тураллар, үлэлиэхтэрэ даҕаны, — диэн Ольга Валерьевна бэлиэтээтэ.

Ангелина Васильева, “Саха сирэ” хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0