М.К.Аммосов аатынан Хотугулуу-Илиҥҥи федеральнай университет мэдиссиинэҕэ институтун иһинэн “Эскулап” устудьуоннар этэрээтэ үлэлээбитэ быданнаата. Устудьуоннар университекка төһүү күүс буолаллар.
Күн бүгүн “Эскулап” 40 чилиэннээх. Манна сүрүннээн мэдиссиинэ институтун устудьуоннара, Дьокуускайдааҕы медицинскэй кэллиэстэн университекка киирээри сылдьар устудьуоннар бааллар. Аҥаардара иккилии буолан университет уопсайдарыгар эппиэттээхтэр. Уопсайга олорооччулар доруобуйаларын көрөллөр-истэллэр, бастакы көмөнү оҥороллор, ирдэнэр буоллаҕына суһал массыынаны ыҥыраллар, хаан баттааһынан, устудьуон этин сылааһын кэмнээһин кинилэр эбээһинэстэрэ. Ону таһынан, университет ыытар тэрээһиннэрэ “Эскулап” көмөтө суох ааспат.
“Эскулап” хамандыыра, медицинскэй институт 2-с кууруһун устудьуона Айталыына Колесова:
— Күн бүгүн “Эскулап” чилиэннэрэ волонтерунан, колл-кииҥҥэ, обсерваторга, улуустарынан, балыыһаларынан бэйэлэрин баҕаларынан көмөлөһө сылдьаллар. Волонтер диэн бэйэтин ис сүрэҕиттэн баҕаран туран, ким даҕаны күһэйиитэ суох үлэлиир буоллаҕа. Преподавателлэр волонтердуур оҕолору өйүүллэр, сорудахтарын чопчу араспыысаанньанан буолбакка, атын бириэмэҕэ тутуохтарын сөп.
Муус устар ортотугар РФ Доруобуйа харыстабылын министиэристибэтэ Арассыыйа үрдүнэн көмө эрэйиллиэ диэн үлэлиэн баҕалаах устудьуоннар испииһэктэрин хомуйбута. Холобур, бу устудьуон сиэстэрэ үөрэхтээх, үлэлиэн сөп диэн ыыталыахпытын сөп. Оннук бырагыраама эмиэ баар, — диэн кэпсиир.
“Эскулап” чилиэннэрэ үөрэхтэрин бүтэриэхтэрин, диплом ылыахтарын иннинэ билиҥҥи курдук уустук балаһыанньаны аахсыбакка туран, сүрэхтэрин баҕатынан дьон доруобуйатын туһугар төһүү күүс буолаллар.
Людмила ПОПОВА, «Саха сирэ» хаһыат, edersaas.ru