Бүгүн, бэс ыйын 23 күнүгэр, 11:00 чааска Саха сирин Ил Дархана Айсен Николаев эрэгийиэҥҥэ коронавирус балаһыанньатын туһунан брифинг ыытта.
Ил Дархан Айсен Николаев:
— Саха сиригэр дьаҥ туруоҕуттан 3817 киһи коронавируска сутулунна. Ааспыт сууккаҕа 75 киһи ыарыйда — 61 киһи Дьокуускайга, 14 киһи улуустарга (ол иһигэр 6 киһи Нерюнгрига). Балаһаыанньа билигин даҕаны уустук. 75 киһи ыалдьыбыта диэн бу нэдиэлэ устата саамай кыра көрдөрүү. Ол эрээри, оройуоннарга балаһыанньа уустугуран иһэр, ыарыы саҥа тарҕананан эрэ улуустара бааллар.
Оройуоннарга Дьокуускайтан кэлбит аймахтарыттан ыарыыга сыстыбыт түгэннэр баар. Ол курдук, Кэбээйигэ икки ыалга оннук буолла. Уус Алдаҥҥа көҥүлэ суох такси айаннаан, түөрт киһи ыарыйда. Бу хааччахтыыр миэрэлэри, санитарнай нуормалары тутуспат буолууттан тахсар. Ханна эмит барар буоллаххытына туох баар миэрэни тутуһуоххутун наада.
Хомойуох иһин, ыарахан туруктаах ыарыһах ахсаана элбиир. Бүгүҥҥү күҥҥэ 33 киһи баар, онтон 11 киһи ИВЛ-аппараакка холбонон сытар.
Тести оҥорууга РФ үрдүнэн инники күөннэргэ сылдьабыт. 1000-ттан тахса киһи амбулаторнай эмтэниини ылар.
edersaas.ru