Коронавирус икки долгуна хонтуруолга баар диэн Ил Дархан Айсен Николаев бүгүн быһа эпиир кэмигэр иһитиннэрдэ.
«Эрдэ дьон ОРВИ ыарыыга болҕомто уурбат этэ. Оттон билигин сөтөл, тымныйыы, тумуу барыта коронавирус сибикилэрэ буоллулар. Дьон суһал лиинийэ нүөмэригэр 20 тыһыынчата эрийбит түгэннэрэ да баар. Маныаха систиэмэ ыһыллара баар суол буоллаҕа. Суһал көмө төлөпүөнүгэр сүүрбэ үлэһит баар, олор бачча элбэхтэ эрийиини быһаара охсубаттар», — диэн Ил Дархан эттэ.
Айсен Николаев бэлиэтээбитинэн, поликлиникаларга эрийэн тиийии систиэмэтэ тиһэҕэр диэри оҥоһуллубатах.
«Үгүс киһи быраастар дьиэҕэ кэлбэттэр, эрийбэттэр диэн миэхэ суруйбута. Онон бэнидиэнньиктэн ыла суһал ыстаабы бэйэм салайабын», — диэн, Ил Дархан күннэтэ үлэ ыытылларын эттэ.
«Билигин эрийэн тиийии аччаата. Поликлиникалар былааннаахтык үлэлииллэр. Дьокуускайдааҕы бастакы поликлиника үлэтэ быһаарыллыбыта. Онно, хомойуох иһин, үлэһиттэр 70% хааччахтааһыҥҥа олороллор, ыалдьыбыттар да бааллар. Миэдиктэр эмиэ дьон, кинилэр эмиэ ыалдьаллар», — диэтэ Айсен Николаев.
Итиэннэ өрөспүүбүлүкэ баһылыга стационарга миэстэ тиийбэтин бэлиэтээтэ. «Дьокуускай быраастара ким балыыһаҕа киирэн эмтэнэрин билэллэр. Ыалдьыбыт дьон бары балыыһаҕа киириэхтээхтэр диэн буолбатах. Ыарыыны чэпчэки соҕустук аһардар дьон дьиэттэн эмтэниэхтээхтэр», — диэн Айсен Николаев эттэ.
edersaas.ru