Коронавирус ханнык бэлэхтэн сыстыан сөбүй?

Ааптар: 
Бөлөххө киир:

Бу күннэргэ Саҥа дьыллааҕы бэлэхтэри атыылаһыы сүпсүлгэнигэр сыстыганнаах дьаҥтан сэрэнии умнулла быһыытыйда. 

edersaas.ru

Маҕаһыынтан, ырыынактан ылыллыбыт бэлэх коронавирус дьаҥын тарҕатааччынан буолуоҕун сөбүн туһунан РИА Сонуннарыгар эмчиттэр сүбэлэрин СИА холобурдаата.  Ол курдук, хортуон таһыгар вирус сууккаҕа тиийэ, оттон пластикка уонна тимиргэ үс күҥҥэ диэри сылдьар эбит.

«Уопсайынан ханнык баҕарар эттиккэ Sars-CoV-2 вируһа баар буолуон сөп. Онон Саҥа дьыллааҕы бэлэҕи ылыы сүпсүлгэнигэр ордук кумааҕы харчыттан уонна хортуон, пластик, тимир эттиктэн  сэрэниҥ, — диэн эпидемиолог быраас Ольга Ненастина сэрэтэр. Эмчит «вирус, маны таһынан, тас уонна утуйар таҥаска эмиэ баар буолуон сөп. Онон уһун сынньалаҥ күннэргэ, итии дьиэттэн тахсыбакка олорор кэмҥэ, таҥаһы чаастатык уларыттар, утуйар таҥаһы эмиэ сотору-сотору саҥардар ордук» диэн сүбэлиир.

Мэдиссиинэ наукатын дуоктара, иммунолог-быраас, ураты кутталлаах инфекцияны бохсууга идэтийбит исписэлиис Владислав Жемчугов атыылаһыллыбыт бэлэхтэри тута дезинфекциялыырга сүбэлиир. «Ылыллыбыт бэлэхтэри хас да күн болкуоҥҥа таһааран уура түһүөххэ сөп«, — диэн этэр быраас.

«Элбэх киһи мустар кэмигэр хайаан да мааскаҕытын уонна бэрчээккэҕитин кэтиҥ«, — диэн эмчиттэр сүбэлииллэр. Ыарыы ордук бу маннык кэмнэргэ тарҕанар эбит.  Бу күһүн атырдьах ыйын бүтэһигэр оҕо оскуолаҕа киириитин саҕана маҕаһыыннар, ырыынактар толору киһинэн туола түспүттэрэ. Ол кэнниттэн балаҕан ыйын-алтынньы ыйдарга дьон маассабайдык ыалдьыыта элбии түспүтэ. Билигин аны Саҥа дьыллааҕы аһы-үөлү хаһаанаары, бэлэх атыылаһаары, дьон маҕаһыыннарга ырыынактарга тоҕуоруһуута үгүс. Саҥа дьыл бырааһынньыга ахсынньы 31 күнүнэн бүппэт. Тохсунньу 3 күнүттэн бары маҕаһыыннар, ырыынактар аһыллан, үлэлээбитинэн барыахтара. Оттон ас маҕаһыыннара тохсунньу 1 күнүттэн үлэлэрин тохтотооччулара суох. Онон сыстыганнаах дьаҥ саҕана маҕаһыыннартан, ырыынактартан сэрэнэ сылдьаргытыгар сүбэлиибит.

Елена ПОТОЦКАЯ, «Саха сирэ» хаһыат, edersaas.ru

Хаартыска — СИА саайтыттан.

+1
0
+1
0
+1
0
+1
0
+1
0
+1
0
+1
0