Саха сиригэр коронавирус дьаҥа салгыы тарҕамматын туһуттан хааччахтыыр миэрэлэри ыам ыйын 11 күнүгэр диэри уһаттылар.
edersaas.ru
Маннык ыйаахха бүгүн, муус устар 29 күнүгэр, өрөспүүбүлүкэ Ил Дархана Айсен Николаев илии баттаата. Муус устар 28 күнүгэр дойду бэрэсидьиэнэ Владимир Путин 294 нүөмэрдээх уурааҕар «Миэрэни хааччахтааһын санитарнай-эпидемиологическэй балаһыанньа тупсуор диэри ыам ыйын 11 күнүгэр диэри уһатыы» туһунан эппитэ.
Онон бары үөрэх кыһалара салгыы дьиэттэн олорон үөрэниэхтэрэ.
Ону сэргэ киэһэ 18.00 чаастан күнүс 14.00 чааска диэри арыгы атыытын бопто.
Муус устар 30 күнүгэр диэри хаччахтанарга болдьохтоммут тэрилтэлэр уонна чааһынай урбаанньыттар үлэлэрэ эмиэ бу күҥҥэ диэри тохтоото.
Маны таһынан, дьону тиэйии, таксилар өҥөлөрө, М1, М 2 категориялаах оптуобустар уонна «Хивустар» Өлүөнэ, Алдан өрүстэринэн айаннара-сырыылара тохтоото.
Бэлиэтээн эттэххэ, Владимир Путин видео-кэмпириэнсийэтигэр эрэгийиэн баһылыктара кыттыбыттара.
Ульяна Захарова, edersaas.ru