Бүгүн, олунньу 1 күнүгэр, СӨ Ил Дархана Айсен Николаев быһа эпииргэ таҕыста.
Коронавирус дьаҥынан Дьокуускайга эбии куойкалары аһыахпыт. Ону сэргэ, амбулаторнай звеноҕа үлэлиир миэдиктэргэ ноҕурууска элбээтэ. Поликлиникаларга уочарат аһары элбээн, ону арыый аччатар туһуттан «Триумф” успуорт комплексыгар амбулаторнай киин арыйбыппыт. Бастакы күн босхо анаалыс туттараары ыалдьыбатах да дьон тиийбиттэр этэ. Быһаарыы үлэтэ күүскэ ыытыллан бэрээдэк олохтонно. Түгэнинэн туһанан мэдиссиинэ үлэһиттэригэр махталбын биллэрэбин. Маннык этэҥҥэ үлэлээн, харыстанан сырыттахпытына, нэдиэлэ курдугунан ыарыы арыый намтыан сөп. Ол эрээри билигин аны оройуоннарга дьаҥ элбээн эрэрэ бэлиэтэнэр. Локдауну билиҥҥи туругунан көрбөппүт, тоҕо диэтэр ыарыы арыый чэпчэкитик ааһар, иккиһинэн, дьаҥы утары охсуһа үөрэннибит. Үсүһүнэн, өрөспүүбүлүкэ олохтоохторун улахан аҥаардара вакциналаахтар. Билиҥҥи туругунан оскуола 50% тэйиччиттэн үөрэнэ олорор.
Ульяна ЗАХАРОВА.