Коронавирус дьаҥын кэнниттэн оҕо доруобуйатын хайдах чэбдигирдэбит, чөлүгэр түһэрэбит?
Олунньу 11 күнүгэр куйаар ситимин нөҥүө ыытыллыбыт ситэриилээх былаас Аллайыаха оройуонугар отчуота бэрт сэргэхтик саҕаланна.
Оройуон олохтоохторун болҕомтолоро тутуу, хаарбах дьиэттэн көһүү, үлэ бэтэрээннэригэр өйөбүл уонна коронавирус дьаҥар ыалдьыбыт оҕолор доруобуйаларын чөлүгэр түһэрии боппуруостарыгар уурулунна.
Оройуоммутугар аҕыйаҕа суох оҕо коронавирус дьаҥар сутуллан ыалдьыбыта. Эмтэнэн үтүөрбүттэрин да иһин кинилэр доруобуйаларын чөлүгэр түһэрэр үлэ барыахтаах дии саныыбыт. Сахабыт сирин да иһинэн буоллун, ханнык эмэ босхо санаторийдарга кубуота баар буолуо дуо?
Бу ыйытыыга доруобуйа харыстабылын миниистирэ Лена Афанасьева хоруйдаата:
—Субсидия өҥөтүнэн туһанан Саха сирин эрэ иһигэр буолбакка Арассыыйа улахан лааҕырдарыгар «Орленок”, “Артек”, Владивостокка “Океан” лааҕырга оҕолору ыытыахха сөп. Оҕолор доруобуйаларын чөллөрүгэр түһэрии уонна эмтээһин икки тус-туһунан хайысха буолар. Онон мэдиссиинэ өттүнэн чөлүгэр түһэрэр туһунан этэр буоллаххытына, биһиги оройуон сүрүн бырааһын Туйаара Николаевнаны кытта кэпсэтиэхпит уонна оройуон киин балыыһатыгар эбэтэр таһыттан эмтэнэр көрүҥнэри быһаарсыахпыт.
Ульяна ЗАХАРОВА.