Бэс ыйын 5 күнүнээҕи чахчынан, Саха сиригэр уопсайа 2380 киһи коронавирус дьаҥар хаптарбыта бэлиэтэммитэ. Үтүөрбүтэ — 1137 киһи. Бу уодаһыннаах ыарыыны бохсор үлэлэр ханна да тиһиктээхтик салҕаналлар, Дьокуускайга дезинфекциялыыр үлэлэр ыытыллаллар . Оттон дьон-сэргэ ирдэбиллэри төһө тутуһарый, итиннэ туох санаалааҕый?
Таатта улууһун Дьохсоҕон нэһилиэгин олохтоохторо Бысыиннар дьиэ кэргэн санааларын үллэһиннилэр. Ыал аҕа баһылыга, ССРС спордун маастарыгар кандидат, оҕолору боксаҕа дьарыктыыр үтүөкэннээх тириэньэр Николай Николаевич:
—Биһиги, тыа сирин ыала, ирдэбиллэри тутуһабыт. Тоҕо диэтэххэ, бу аан дойдуга турбут уодаһыннаах дьаҥы бохсууга, тарҕаппат туһугар хас биирдии киһи кыһалыннахпытына эрэ хам баттыахпыт, кыайыахпыт. Ону оҕолорбутугар эмиэ өйдөтөбүт.
Маныаха, дьиэҕэ хааччахтанан олоруу, ол-бу быстах наадаҕа мээнэ кэлбэт-барбат буолуу кэмигэр, тугунан дьарыгырары былаанныыр, үлэни толкуйдуур ордук. Бириэмэни туһалаахтык атаарарга бэйэбит кыһаллыахтаахпыт. Биһиги быар куустан олорбоппут. Дьиэ ис-тас үлэтэ, үүнээйи олордуута, тиэргэҥҥэ ону-маны оҥоруу, өрө тардыы, кыралаан уһаныы да элбэх буоллаҕа. Ону сэргэ, сибиэһэй салгыҥҥа сэрээккэ, сөптөөх хамсаныы-имсэнии доруобуйаны бөҕөргөтөр.
Биллэн турар, коронавирус дьаҥын бохсуу, намыратыы уонна хаптатыы, барыта бэйэбититтэн тутулуктаах. Онуоха Дьокуускайга өрөбүллэргэ турунан дезинфекциялааһыннары тэрилтэлэргэ, оптуобустарга күүскэ тэрийбиттэрэ саамай сөптөөх. Билигин, аны, дьон ирдэбили тутуһарыттан, тус бэйэтигэр уонна тулалыыр дьонугар төһө болҕомтолоох буоларыттан түмүк көстөн барыаҕа, — диэн эттэ.
edersaas.ru