Бүгүн, ыам ыйын 25 күнүгэр, бырабыыталыстыба бэрэссэдээтэлин солбуйааччы Ольга Балабкина быһа эпииргэ тахсан, коронавирус дьаҥын туһунан уопсай балаһыанньаны билиһиннэрдэ.
Ол курдук, бүтэһик сууккаҕа 105 киһи коронавирус дьаҥар сыстыбыт. Ольга Валерьевна иһитиннэрбитинэн, Дьокуускайга 64 киһи бу дьаҥҥа сутуллубут. Саамай уустук балаһыанньалаах Мэҥэ Хаҥалас улууһугар ыарыы таһыма арыый намтаабыт эрээри, вакцинаны ылыы бытааннык ыытыллар эбит. Онуоха улууска тиийбит вакцина ахсаана элбэх. Анал пууннар үлэлииллэр эрээри, олохтоохтор вакцинаны ылыыларын туруга бытаан диэтэ. Маны таһынан, Бүлүү уонна Уус Алдан улуустарыгар түөртүү, биэстии киһи ыалдьыбыт. Атын улуустарга биирдии-иккилии түгэн көстөрүн эттэ.
Бу дьаҥ оҕо күүтэр уонна оҕолору эмийдиир ийэлэргэ сэрэхтээҕин бэлиэтээтэ. Бүгүҥҥү туругунан өрөспүүбүлүкэҕэ 196 тыһыынча доза вакцина кэлбит. Эбии 5000 доза кэлэрэ күүтүллэр. Сарсын 3000 доза вакцина аҕалыллара күүтүллэр. Бары поликлиникаларга вакцина туруорар пууннар үлэлии тураллар. Дьаҥҥа сыстан ыараханнык ыалдьыы ахсаана элбэх диэн бэлиэтээтэ Ольга Валерьевна.
Ульяна Захарова, edersaas.ru