Бүгүн урбааҥҥа координационнай сэбиэт мунньаҕар Ил Дархан Айсен Николаев урбаанньыттары маҕаһыыннарга, атыы-эргиэн кииннэригэр, кафеларга, эрэстэрээннэргэ уо.д.а. элбэх киһи мустар сирдэригэр туох баар санитарнай-эпидемиологическай ирдэбиллэри күүскэ хонтуруоллуурга ыҥырда.
Айсен Сергеевич коронавирус дьаҥар сутуллуу элбээн иһэрин бэлиэтээтэ. Кини этэринэн, Дьокуускайга уонна Мэҥэ Хаҥаласка балаһыанньа уустугурбут.
Итиэннэ Алдан оройуонугар коронавирус британскай штаммынан ыалдьыы бастакы түгэнэ бэлиэтэммитин эттэ. «Коронавирус британскай штаммынан ыалдьыы элбээтэр элбээн иһэр. Бу ыарыы наһаа түргэнник тарҕанар. Онон үлэһиттэргит мааска эрэсиимин тутуһалларын, эбийиэккэ дезинфекция үлэтэ барарын көрүҥ. Ордук маай бырааһынньыктарын өрөбүллэрин кэмигэр манна болҕомтоҕутун ууруҥ», — диэтэ Ил Дархан.