«Омикрон” дьайыыта чэпчэки” диэн санаа дьону уоскутар. Ол эрээри коронавирустан дьон билигин даҕаны улаханнык сыыстарар, өлөр да түгэннэрэ бааллар. Ол курдук, ааспыт сууккаҕа Арассыыйа үрдүнэн COVID-19 инфекцияттан сылтаан 748 суорума суолламмыта чахчыламмыт. Бу тохсунньу 11 күнүттэн муҥуутуур улахан көрдөрүү (ол күн 783 киһи коронавирустан тыына быстыбыта) буоларын Суһал ыстаап биллэрэр.
Саамай элбэх ыар сүтүк киин куораттарбытыгар: Москваҕа (87) уонна Санкт-Петербурга (75) бэлиэтэммит. Атын куһаҕан көрдөрүүлээх эрэгийиэннэр:
Москва уобалаһа – 30
Красноярскай кыраай – 24
Пермскай кыраай — 24;
Алтайскай кыраай — 21;
Нижегородскай уобалас — 20.
Хамсык саҕаланыаҕыттан Арассыыйа үрдүнэн 342 383 киһи COVID-19 сиэртибэтэ буоллулар. Оттон Росстат ааҕар ньыматынан (коронавирус атын ыарыыны кытта дьүөрэлэһиитинэн уонна өлбүттэрин кэннэ эккэ-сииҥҥэ коронавирус төһө баарынан) сылыктаатахха, бу ыарыыттан 625 тыһыынчаттан тахса киһи күн сириттэн күрэммит буолуон сөп.
«Саха сирэ» хаһыат, edersaas.ru
Хаартыска sakha.gov.ru