Коронавирус: «АЛРОСА» көмөтүн кээмэйин 308 мөлүйүөҥҥэ диэри улаатыннарда
«АЛРОСА» коронавируһу утары охсуһуу миэрэлэрин үбүлээһин кээмэйин 308 мөлүйүөҥҥэ диэри улаатыннарда
edersaas.ru
Былааннаммыт суума улахан аҥаара номнуо туһанылынна. «АЛРОСА» эрэгийиэннээҕи балыыһаларга, хампаанньа Мэдиссиинэҕэ пууннарыгар, СӨ сиригэр-уотугар, ону сэргэ Архангельскайга уонна Москваҕа баар тэрилтэлэригэр көмүскэнэр уонна дезинфекциялыыр сириэстибэлэри, мэдиссиинэ тэриллэрин салгыы атыылаһар.
Муус устар 14 күнүнээҕи туругунан, «АЛРОСА» былааннаабыт уопсай ороскуота 307,8 мөлүйүөн суумаҕа тэҥнэстэ. Ону сэргэ, 247 мөлүйүөн суумаҕа мэдиссиинэ тэриллэригэр уонна сириэстибэлэргэ төлөбүрдэр оҥоһулланнар, аҕалылларга бэлэмнэр, сорохторо номнуо тиэрдиллэн туһаныллан эрэллэр.
Ылыллар дьаһаллар Мииринэй уонна Ленскэй улуустарын балыыһаларыгар — 24,9 мөлүйүөн суумалаах эмтэри уонна тэриллэри атыылаһарга, кииннэммит көмөнү оҥорууну учуоттууллар. СӨ Доруобуйа харыстабылын министиэристибэтигэр 28800 тест – «Изотерм SARS-CoV-2 РНК-скрин» ньыматынан РНК быһаарар реагеннар нобуордара (23 мөлүйүөн суумалаах) бэриллиэҕэ.
Коронавирус баарын-суоҕун быһаарар түргэн диагностика алта дьоҕус лабораториятын уонна 120 салгын рециркуляторын, хампаанньа Мэдиссиинэҕэ киинин здравпууннарыгар аҕалыахтара.
Мэдиссиинэ киинин пууннарыгар 50 пульсоксиметр (хаан кислородунан төһө байытылларын хонтуруоллуур-быһаарар прибор) бэрилиннэ.
Хампаанньа Саха сиригэр уонна Москваҕа баар доруобуйа харыстабылын пууннарыгар уонна подразделениеларыгар анаан, салгыны 99,9% дезинфекциялыыр 14 бактерициднай тэрили, ону сэргэ 17 тепловизоры атыыластылар. Тепловизордар дьон кыраадыһын хантаага суох тута мээрэйдиир кыахтаахтар.
Ону сэргэ, эмтэри уонна вирустан көмүскэнэр сириэстибэлэри атыылаһыы салҕанар. Чуолаан, Мэдиссиинэ киинигэр уонна хампаанньа сыахтарыгар илиини дезинфекциялыыр 9776 сириэстибэ, 172 хантаага суох бэрэбиэркэлиир термометр, 2000 тахса элбэхтик уонна биирдэ эрэ кэтиллэр көмүскэнэр көстүүмнэр, 43 тыһыынчаттан тахса бэрчээккэ, 2,3 мөлүйүөн мэдиссиинискэй мааска уонна респиратордар бэрилиннилэр.
“Бу судургута суох кэмҥэ, биһиги кэлэктииппитин уонна алмаастаах түөлбэ олохтоохторун эрэ буолбакка, бэйэлэрин үлэлэрин үтүө суобастаахтык уонна үрдүк таһымнаахтык толоро сылдьар эмчиттэри эмиэ өйүөхпүтүн баҕарабыт. Кинилэр билигин чэпчэкитэ суох усулуобуйаҕа үлэлииллэр. Биһиги доруобуйабыт туһугар охсуһар дьоммутугар кыһаллыахтаахпыт”, – диэтэ АЛРОСА генеральнай дириэктэрин солбуйааччы Алексей Дьячковскай.
Надежда ЕГОРОВА, “Саха сирэ” хаһыат, edersaas.ru