Саха сиригэр өссө сэттэ киһи коронавирус дьаҥыгар сутулунна
Бүгүн, муус устар 26 күнүгэр, сарсыарда 11:00 чааска СӨ Доруобуйа харыстабылын миниистирэ Елена Борисова эрэгийиэҥҥэ коронавирус балаһыанньатын туһунан брифинг ыытта.
— Саха сиригэр балаһыанньа уустук. Ол курдук, бүгүҥҥү туругунан уопсайа 159 киһи дьаҥҥа ылларда. Бүгүн өссө сэттэ киһи эбии ыалдьыбыта билиннэ.
Ыарыы тарҕаныыта үс көрүҥнээх: тастан аҕалыы, дьаҥнаах дьону кытта хантаактаспыт дьон ыалдьара уонна «хаотичнай». Ол аата, хантан да кэлбитэ биллибэккэ ыалдьыы. Холобура, бэҕэһээ Хаҥаласка ыалдьыбыт киһи ханна да сылдьыбатах, кимниин да хантаактаспатах.
Ыарыы өрөспүүбүлүкэбит тоҕус оройуонугар баар, ол иһигэр Дьокуускайга.
18 киһи үтүөрдэ. Хомойуох иһин, бэҕэһээ биир киһи тыына быһынна. Кини олоҕун иһин быраастар турууласпыттара. Чугас дьонугар кутурҕаммытын биллэрэбит. Билигин өссө икки киһи ыарахан туруктаах сытар.
Өрөспүүбүлүкэ олохтоохторо чугас дьоҥҥутун харыстыыргытыгар ыҥырабын. Эдэрдэргэ ыарыы сибикитэ биллибэккэ кэриэтэ ааһар буоллаҕына, саастаах дьон олус ыараханнык ыалдьыан сөп.
Миэдиктэр балтараа ый тухары быыстала суох үлэлээтилэр. Бары миэдиктэргэ быраабыланы тутуһуҥ, сэрэхтээх буолуҥ диэн туһаайан этэбин.
edersaas.ru
Хаартыска — интэриниэттэн.