Саха сиригэр өссө сэттэ киһи коронавирус дьаҥыгар сутулунна
Бүгүн, муус устар 24 күнүгэр, сарсыарда 11:00 чааска Саха сирин Ил Дархана Айсен Николаев эрэгийиэҥҥэ коронавирус балаһыанньатын туһунан брифинг ыытта.
«Муус устар 24 күнүнээҕи туругунан Саха сиригэр өссө сэттэ киһи коронавируһунан ыалдьыбыта билиннэ.
Өймөкөөн улууһугар биир киһи дьаҥҥа сутуллубута бигэргэннэ. Уус Ньара бөһүөлэгэр баахтанан үлэлиир киһи ыалдьыбыт. Хантаактаспыт дьон быһаарылыннылар, анаалыстары ыллылар. Өймөкөөнтөн бөртөлүөтүнэн анаалыстары Дьокуускайга аҕалыахтара.
Анаалыстары бэрэбиэркэлээн баран, Уус Ньараҕа харантыын оҥорору дуу, оҥорботу дуу быһаарыахпыт», — диэн Ил Дархан иһитиннэрдэ.
Билиҥҥи туругунан Дьокуускайга эбии биэс киһи ыалдьыбыт. Икки ыарахан туруктаах киһини Чайыҥдаттан аҕаллылар. Ыалдьыбыт дьону кытта хантаактаспыт икки киһи сутулунна. Уонна хантан ыарыыга сыстыбыта биллибэт суут бириистэбин үлэһитэ ыалдьыбыт. Маны таһынан, өссө биир киһи Ленскэйгэ Чайыҥдаҕа ыалдьыбыт.
Улахан куораттар уопуттара көрдөрөрүнэн, дьиэҕэ хааччахтаан олорууну этэҥҥэ тутустахпытына, дьаҥы аһарыныахпытын сөп диэн Айсен Сергеевич этэр.
Алдан оройуонун суһал ыстааба үчүгэйдик үлэлии олорор. Ыалдьыбыт дьон ахсаана элбии илик. 43 киһи эмтэниини ааһан, Алдан балыыһатынар сытар.
Ульяна Захарова, edersaas.ru