Билиҥҥитэ Саха сирин үрдүнэн 88 киһи коронавирус дьаҥыгар сутулунна

Саха сиринээҕи Роспортребнадзор управлениетын саайта иһитиннэрэринэн, билиҥҥитэ өрөспүүбүлүкэ үрдүнэн коронавирустаабыт киһи ахсаана 88-ка тиийбит.

Ол курдук,

Дьокуускайга — 27 киһи;

Алдаҥҥа — 40 киһи;

Ленскэйгэ — 5 киһи;

Горнайга — 2 киһи;

Бүлүүгэ — 2 киһи;

Мииринэйгэ — 1 киһи.

88 дьаҥнаабыт дьонтон 16-та үтүөрэн, балыыһаттан тахсыбыттара.

Өрөспүүбүлүкэ стационардарыгар 61 ыарыһах сытар, өссө 11 ыарыһах «Газпром добыча Ноябрьск» баахтабай бөһүөлэккэ баар.

Саха сиринээҕи Роспотребнадзор управлениетын, Саха сиринээҕи гигиена уонна эпидемиология киинин исписэлиистэрэ Дьокуускай, Нерюнгри, Мииринэй, Ленскэй уонна Удачнай аэропуортарыгар нэдиэлэ устата 48 рейси, тимир суол ыстаансыйаларыгар 16 буойаһы көрүстүлэр.

СӨ Ил Дарханын ыйааҕынан, кэлбит дьоҥҥо хааччахтааһыҥҥа олороллоругар постановление туттараллар, күннэтэ испииһэги ИДьМ-ҥа бэрэбиэркэҕэ тиэрдэллэр. Бу нэдиэлэ устата аэропуортартан уонна тимир суол ыстаансыйаларыттан дьиэҕэ хааччахтанан олорор кыаҕа суох 177 киһини обсерваторга киллэрдилэр.

Инньэ гынан, билигин өрөспүүбүлүкэ обсерватордарыгар 349 киһи баар, олор истэригэр 51 киһи тас дойдуттан, 146 киһи РФ атын эрэгийиэннэриттэн кэлбит дьон. Оттон 152 киһи  COVID-2019 ыарыылаах дьону кытта хантаактаспыттар бааллар.

Өрөспүүбүлүкэ үрдүнэн сэттэ коронавирус дьаҥын быһаарар лаборатория үлэлиир, манна дьаҥ саҕаланыаҕыттан 15 090 анаалыһы туттулар.

edersaas.ru