Саха сиригэр коронавирустан сылтаан любительскай балыктааһыҥҥа туспа бобуу оҥоһуллуо суоҕа

Муус устар 17 күнүгэр Саха сирин вице-премьерэ Денис Белозеров СӨ бырабыыталыстыбатын иһинэн Балык хаһаайыстыбатын сэбиэтин сүбэ мунньаҕын ыытта. Саха сиригэр коронавирустан сылтаан хааччахтыыр миэрэлэр кэмнэригэр чугас сытар улахан нэһилиэнньэлээх пууннар тастарыгар любительскай балыктааһын боппуруоһа көрүлүннэ.

Экология, айылҕаны туһаныы уонна ойуур хаһаайыстыбатын министиэристибэтин чахчытынан, Саха сиригэр уопсайа 1,5 мөлүйүөн килэмиэтир усталаах 450 тыһыынчаттан тахса өрүс уонна 145 тыһыынча кэриҥэ күөл баар. Балык хаһаайыстыбатын пуондатыгар 9 тыһыынчаттан тахса өрүс киирбитэ. Өлүөнэ, Халыма, Индигиир, Дьааҥы, Өлөөн, Анаабыр өрүстэр балыктааһыҥҥа улахан суолталаахтар.

Күөгүнэн ханнык баҕарар ууга балыктыахха сөп. Маны сэргэ Арктика оройуоннарын 28 балыктыыр учаастагар уонна соболоох күөллэригэр илим тэриллэринэн (куйуур, муҥха, кыра муҥха уо.д.а.) бултууллар.

Өрөспүүбүлүкэҕэ любительскай балыктааһын киһи аһылыгар наада, оттон Арктика оройуоннарыгар олохторун сүрүн тутула.

“Сирбит-уоппут киэҥ уонна нэһилиэнньэбит аҕыйах буолан, биир балыктыыр сиргэ эбэтэр кытылга элбэх киһи мустубат”, — диэн СӨ экологияҕа, ойууру туһаныыга уонна ойуур хаһаайыстыбатыгар миниистирин солбуйааччы Яков Заровняев эттэ.

Маны сэргэ Балыктааһын быраабылатыгар олоҕуран, муус барбытын кэннэ Арктика оройуоннарыгар саас ыыр балыктар көрүҥнэригэр бэс ыйын 25 күнүгэр диэри бултааһын бобуллар. Бу кэмҥэ мотуордаах дьоҕус уонна күүлэйдиир суудуналарынан өрүстэринэн уонна күөллэринэн айаннааһын бобуллар.

Билигин Саха сирин кэккэ муниципальнай тэриллиилэригэр дьон дьиэттэн тахсыбакка олорор кэмнэригэр хаарчахтыыр миэрэлэр олохтонон, балыктааччыларга эмиэ ити хаарчах киирбитэ.

Үөһээ ааттаммыт чахчыларга олоҕуран, СӨ бырабыыталыстыбатын иһинэн Балык хаһаайыстыбатын сэбиэтин чилиэннэрэ Саха сирин сиригэр-уотугар любительскай балыктааһыны анаан-минээн бобууну киллэрэри наадата суоҕунан аахтылар.

«Өрөспүүбүлүкэ сиригэр-уотугар киллэриллибит хаарчахтыыр миэрэлэр чэрчилэринэн дьаһаныахпыт, ордук саҥа коронавриус инфекцията бигэргэммит муниципальнай оройуоннарыгар”, — диэн бэлиэтээтэ СӨ Бырабыыталыстыбатын Бэрэссэдээтэлин солбуйааччы Денис Белозеров.

Саха Өрөспүүбүлүкэтин Ил Дарханын уонна

Бырабыыталыстыбатын пресс-сулууспата.

Бэлэмнээтэ — Женни СТРЮКОВА, “Саха сирэ” хаһыат.

Хаартыска: тустаах саайтан.