Сарсын Алдаҥҥа коронавирус дьаҥын быһаарар лаборатория арыллыаҕа

Билигин Саха сиригэр коронавируска күннэтэ 1000 анаалыһы туталлар. Бүгүн, муус устар 16 күнүгэр, СӨ бырабыыталыстыбатын бэрэссэдээтэлин солбуйааччы Ольга Балабкина брифинигэр иһитиннэрбитинэн, Алдаҥҥа турбут уустук быһыынан-майгынан сарсыҥҥыттан лаборатория үлэлиэҕэ. 

«Өрөспүүбүлүкэҕэ 12 тыһыынча анаалыһы ыллылар. Манна хаттаан тутар анаалыһы аахтахха өссө элбэх буолар«, — диэн Ольга Валерьевна бэлиэтиир.

Брифиҥҥэ бэрэссэдээтэли солбуйааччы Алдаҥҥа саҥа ыалдьыбыт киһи ыарыытын бэлиэлэрин туһунан кэпсээтэ. Ыарыһах бастаан температурата тахсыбытыгар бырааһы ыҥырбыт. Ол кэнниттэн кинини инфекционнай балыыһаҕа киллэрбиттэр. Бүгүҥҥүттэн ыарыһах коронавирустан эмтэниитин саҕалаабыт.

Билигин Роспотребнадзор ыарыһах хантаактаспыт дьонун быһаарар. Кинилэри обсерваторга киллэриэхтэрэ, сорохторун дьиэҕэ бэйэни хааччахтаан олордуохтара. «Сарсын сарсыарда ыарыы тарҕаныытын билиэхпит. ОРВИ бэлиэлээх ыарыйдаххытына поликлиникаҕа тиийимэҥ, дьиэҕитигэр олоруҥ. Дьиэҕэ бырааһы ыҥырыҥ», — диир Ольга Балабкина.

edersaas.ru