Арассыыйаҕа сыстыгыннаах дьаҥы илдьэ сылдьар ыалдьара биллибэт киһи ахсаана 30% үрдээбит. Бу туһунан Интерфакс саайт иһитиннэрэр.
Бу туһунан РФ Роспотребнадзорун салайааччы Анна Попова «Бастакы» ханаалга кэпсээбитин, дойду ааттаах-суоллаах интэриниэт саайтара иһитиннэрдилэр.
Дойду кылаабынай санитарнай бырааһа бэлиэтииринэн, маннык пациеннары доруобай дьону тест ньыматынан быһаарыы кэмигэр буллулар. Өскө кулун тутарга кэккэ эригийиэҥҥэ ыалдьаллара биллибэт эрээри, коронавируһу илдьэ сылдьар дьон ахсаана 10% эбит буоллаҕына, аҥардас Москва уобалаһыгар билигин доруобай туруктаах эрээри, инфекцияны илдьэ сылдьааччы ахсаана 52% буолбут.
— Онон бүгүҥҥү күҥҥэ дьон дьиэттэн олох тахсыбакка олороллоро наада. Исписэлиистэр туох да түмүгэ суох сыстыганнаах дьаҥы илдьэ сылдьар дьон доруобуйаларыгар кэлин туох охсуу буолуохтааҕын этэр кыахтара суох. Доруобай дьону бэрэбиэркэлээһин анаалыстарын түмүгэ бу нэдиэлэ бүтүүтэ эрэ биллиэҕэ, — диэн РФ Роспотребнадзорун салайааччыта Анна Попова иһитиннэрдэ.
Сыстыганнаах ыарыы бастакы симптомнара: төбө ыарыыта, күөмэй куурута, кыраадыс үрдээһинэ, сыты, амтаны билбэт буолуу, сөтөл. Олох ыалдьыбакка сылдьыбыт киһини сыстыганнаах дьаҥ эмискэ буулаан, суорҕаннаах-тэллэххэ охторор түбэлтэтэ үксээтэ. Иммунитеттара күүстээх дьон ыалдьыбакка да сылдьан, коронавируһу илдьэ сылдьыахтарын эмиэ сөп эбит. Онон, ыарыытын биллэрбэккэ да сылдьан ситэн ылан «сиир» дьаҥтан, кытаатан, сэрэхтээх буолуоҕуҥ, дьиэттэн тахсыбат кытаанах эрэсиими тутуһуоҕуҥ.
Елена ПОТОЦКАЯ, «Саха сирэ» хаһыат.
Хаартыска — интэриниэттэн.