Арассыыйаҕа бу күннэргэ коронавируһунан ыалдьыбыт киһи ахсаана күн-түүн эбиллэ турар. Тоҕо? Маныаха хоруйун быраастар быһаараллар.
Күн бүгүн Арассыыйаҕа коронавируһунан ыалдьыбыт киһи ахсаана 8672 тиийдэ. Итинтэн 1175 киһи кэлиҥҥи сууккаҕа ыарыйда. 582 киһи үтүөрбүт, 63 ыарыһах өлбүт. Оттон Саха сиригэр, уопсайа, 16 киһи ыалдьыбыттан 10 киһи үтүөрдэ.
Ил Дархан Айсен Николаев бүгүҥҥү брифинг кэмигэр дойду үрдүнэн күннэтэ тыһыынчаттан тахса киһи ыалдьар диэн иһитиннэрдэ. Уһук Илин уокурукка ыалдьыбыт киһи ахсаана элбээн эрэрин туһунан эттэ.
Дойду доруобуйатын харыстабылын министиэристибэтин инфекционнай ыарыыларга штаты таһынан кылаабынай исписэлииһэ Елена Малинникова элбэх киһи ыалдьыытын сүрүн төрүөтүнэн, дьон дьиэҕэ олоруу биллэриллээтин кытта тута тутуспатаҕыттан тутулуктааҕын ыйар.
Тэлээбисэринэн көрдөххүт буолуо, дойду салалтата үлэлээбэт күннэри биллэрээтин кытта дьон ыам ыйынааҕы сынньалаҥ күннэрин курдук санаан эбитэ дуу, айылҕаҕа сынньана, шашлыктыы, доҕотторугар, аймахтарыгар ыалдьыттыы сүүрбүтэ. “Бэҕэһээ олус элбэх киһи ыалдьыбыта билиннэ. Оруобуна ити шашлыктар кэннилэриттэн биэс-аҕыс күн буолан баран”, — диэн быраас быһаарар.
Тас дойдуларга эмиэ итинник эбээт. Эрдэттэн дьаһаммыт, дьиэтигэр олорбут дойдуларга ыалдьыбыт киһи ахсаана аҕыйах. Оттон бэйэтэ дьаалытынан ааһыа диэн улахаҥҥа уурбатах дойдуларга өлүү-сүтүү хастыы даҕаны тыһыынчаҕа тиийдэ.
Дьиэҕитигэр олоруҥ диэни көннөрү дойҕох курдук истэбит. Дьиҥэр, салалта биһиги, норуот доруобуйатын туһугар кыһаллар эбээт. Онтон атын харчы төлүү-төлүү дьиэҕэ олордон бэрт. Онон дьиэҕитигэр олоруҥ. Бэҕэһээ аан маҥнайгытын Саха сиригэр 672 анаалыһы оҥордулар. Бары анаалыс бигэргэтиллибэтэх (отрицательнай). Ити сыыппаралар тугу кэрэһилииллэрин өйдөөн-дьүүллээн, толкуйдаан көрүҥ.
Людмила ПОПОВА, edersaas.ru