Коммунарка балыыһатын кылаабынай бырааһа Денис Проценко коронавируһунан ыалдьыбыта билиннэ. Биир нэдиэлэ анараа өттүгэр Проценко Владимир Путинныын, Коммунарка балыыһатыгар кэлэ сырыттаҕына, көрсүбүтэ.
Биллэрин курдук, бу балыыһаҕа коронавируһунан ыалдьыбыт дьону үгүстэрин бииргэ мунньан, эмтииллэр. Кулун тутар 31 күнүнээҕи туругунан, Арассыыйа үрдүнэн 2337 киһи ыарыйда, 17 киһи тыына быһынна, 121 киһи үтүөрдэ. Барыта 73 эрэгийиэҥҥэ коронавируһунан ыалдьаллар.
Денис Проценко бэйэтин туругун туһунан «Фэйсбукка» суруйда:
“Доҕоттоор, болҕомтоҕут иһин махтанабын. “Ковид-19” диагноһа бигэргэннэ, ол эрээри туругум үчүгэй. Кабинеппар хатанан олорон, салгыы үлэлиибин, усулуобуйа барыта баар. Ыйы быһа бөҕөргөөбүт иммунитетым утарсыаҕа, ыарыыны кыайыаҕа”, — диэн.
Балыыһа үлэлээбитин курдук үлэлии турар. Быраастар, сиэстэрэлэр күн аайы тест туттараллар. Бу балыыһаҕа бастакы сыстыбыт дьонтон хас да киһи өллө.
Оттон кылаабынай быраас ыалдьыбыта биллибитин кэннэ, бэрэсидьиэн пресс-сэкиритээрэ Дмитрий Песков суруналыыстарга “Путин күн аайы тест туттарар, барыта нуорма иһинэн” диэн биллэрдэ.
Ангелина Васильева, «Саха сирэ» хаһыат, edersaas.ru
Хаартыска: mail.ru