Омук сирдэриттэн кэлбит өрөспүүбүлүкэ олохтоохторо 8-800-100-14-03 нүөмэргэ эрийэн тустаах сибидиэнньэни биэриэхтээхтэр. Ол эбэтэр, ханнык дойдуттан, хаһан кэлбиттэрин, кимниин хантаактаспыттарын уо.д.а. биллэриэхтээхтэр. Ону таһынан, быстах кэмҥэ үлэлээбэттэрин туоһулуур больничнай лиис уонна мэдиссиинискэй кэтээн көрүү кэмигэр үөрэхтэн босхолонуу туһунан ыспыраапка туһунан сүбэни-аманы ылыахтара.
ЭБИИ ДЬАҺАЛЛАР ЫЛЫЛЛАЛЛАР
СӨ Роспотребнадзор управлениета иһитиннэрбитинэн, кулун тутар 14 күнүгэр өрөспүүбүлүкэ тэрилтэлэрин бары салайааччыларыгар сэрэтэр үлэҕэ эбии миэрэлэри ылалларыгар дьаһал бэрилиннэ.
Ол курдук:
— СӨ Роспотребнадзор управлениетын 8-800-550-21-24 уонна СӨ Доруобуйа харыстабылын министиэристибэтин 8-800-100-14-03 “быһа сибээстэринэн” иһитиннэрэргэ;
— COVID-19 саҥа коронавируснай инфекция өрө турбут сирдэриттэн кэлбит дьон суһаллык иһитиннэрэллэригэр уонна кинилэри 14 күн устата үлэлэриттэн тохтоторго;
— Тэрилтэлэргэ сыстыганнаах микробу өлөрөр (дезинфекциялыыр) эрэсиими киллэриини күүһүрдэргэ, ол иһигэр, илиини мыылалаах уунан сууна сылдьарга, кыраадыһа тахсыбыт киһини үлэтиттэн босхолуурга;
— COVID-19 саҥа коронавируснай инфекция өрө турбут сирдэриттэн кэлбит дьон 14 хонукка уопсастыбаннай миэстэлэргэ уонна үлэҕэ тахсыбат эрэсиимнэрин хонтуруоллуурга;
— Сыстыганнаах микробтары өлөрөр сириэстибэлэр 2 ыйдаах саппаастарын булунарга, икки чаас буола-буола дьиэни салгылатарга, рециркулятордары, бактерициднай лаампалары үлэлэтэргэ;
— Омук сирдэригэр (коронавирус инфекцията тарҕаммыт дойдуларыгар) командировкалары, элбэх дьон сылдьар тэрээһиннэрин хааччахтыырга;
— Остолобуойдарга микробу өлөрөр сириэстибэлэри уонна хлордаах сириэстибэлэри туһанарга.
БЭЙЭҔЭР ЭППИЭТИНЭСТЭЭХТИК СЫҺЫАННАС
Суһал штаб коронавируһу утары охсуһарга ылынар быһаарыылара хайаан да наадалаахтар.
Уһун харантыыннар, уопсастыбаннай миэстэлэргэ бэрэбиэркэлэр уонна салгынынан көтүүлэри тохтотуу — вирус тарҕанарын биллэрдик намыратар миэрэлэр.
Сүрүн миэрэ – бэйэҕэ эппиэтинэстээхтик сыһыаннаһыы: уопсастыбаннай миэстэлэргэ сылдьаргытын аҕыйатыҥ, кырдьаҕас аймахтаргытын кутталтан харыстааҥ, илиигитин элбэхтик сууна сылдьыҥ. Ростуризм испииһэгэр киирбит дойдуларга сылдьыбыт буоллаххытына, биллэриҥ, кыратык да ыарытыйаргытын биллэххитинэ, суһал көмөнү ыҥырыҥ, 8-800-555-49-43 суһал сибээскэ эрийиҥ.
Маны атын дойдулар үөрүйэхтэрэ бигэргэтэр. Кытай кытаанах дьаһалларынан ыарыы өрө туруутун тохтотору ситистэ. Израиль балаһыанньаны туруктаах оҥорор туһугар быһаарыылаах дьайыылары ылар.
Италия, Испания, Франция, Германия уонна Иран, төттөрүтүн, ээл-дээл сыһыаннарын ыарыы кутталыттан бүтэһиккэ диэри өрө туппуттара. Билигин көрөрбүт курдук, бу алдьархайдаах улахан содулга уонна коронавирус хонтуруола суох өрө туруутугар тириэртэ. АХШ өр кэм устата туох буоларын туораттаан кэтээн олордо. Ол түмүгэ – коронавирус өрө туруута.
Оттон биһиги дойдубут кыайа тутуо: 109 тыһыынчаттан тахса тест оҥоһулунна, вирус дойдуга тарҕамматын кэриэтэ, үгүс түбэлтэ кыраныысса таһыгар барыыны кытта сибээстээх, ыалдьыбыт дьон ахсаана аҕыйах.
Арассыыйа билигин тугу оҥороро биир дьоһун сорукка – бэйэтин нэһилиэнньэтин көмүскүүргэ туһуланар.
Доруобуйа харыстабылын тэрилтэтин баһылыга Адам Гебрейесус: “Арассыыйа холобура эрдэттэн ылыллар кытаанах дьаһаллар ыарыы тарҕаныыытын эрдэттэн тохтоторго көмөлөһөллөрүн дакаастыыр”, — диэтэ.
СӨ Доруобуйа харыстабылын министиэристибэтин уонна
СӨ Роспотребнадзор управлениетын иһитиннэриилэрэ туһанылыннылар.
ТАСС хаартыската.