Өрөспүүбүлүкэ Ил Дархана Айсен Николаев «Саха» НКИХ ханаалын нөҥүө быһа эпииргэ тахсан, кулун тутар 23 күнүнээҕи балаһыанньаны билиһиннэрдэ. Ол курдук, тас дойдуттан кэлбит уонна ол дьону кытта алтыспыт дьону кытта үлэ бара турарын иһитиннэрдэ.
Дьокуускайга икки нэдиэлэ аннараа өттүгэр сөмөлүөтүнэн көтөн кэлбит дьон билигин даҕаны самоизоляцияҕа олороллорун кэпсээтэ. Онтон уопсайа 208 киһи бэйэни харыстанан дьиэттэн тахсыбакка олорор эбит. Ону сэргэ, тас дойдуттан кэлбит омук дьонугар обсерватор үлэлиирин, бэйэни харыстаныы эбэһээт тутуһуллуохтааҕын иһитиннэрдэ.
Самоизоляция диэн өйдөбүлү сорох дьон өйдөөбөккө, үлэлэригэр барбакка маҕаһыыннары кэрийэрин, оннук бобулларын эттэ. Ил Дархан өрөспүүбүлүкэ тэрилтэлэрин салайааччыларыгар барыларыгар туһаайан тас дойдуттан кэлбит бииргэ үлэлиир кэллиэгэлэрин бэйэни харыстаныыны (самоизоляция) ыытар булгуччулаах ирдэбилин туруорда.
Өрөспүүбүлүкэ дьонун-сэргэтин доруобуйата быһаччы мантан тутулуктааҕын тоһоҕолоон бэлиэтээтэ. Балаһыанньа хонтуруолга турарын, Дьокуускайга анаалыһы бэрэбиэркэлиир икки лаборатория үлэлиирин, өссө үһүс лаборатория арыллыахтааҕын иһитиннэрдэ. Бэйэни бэрэбиэркэлэнэн быраас көҥүлэ суох анаалыс туттара барары бопто. Лаборатория үлэтин харгыстаабат туһуттан, хайаатар даҕаны быраас көҥүллээх эрэ анаалыс туттарар кыалларын ыйда.
Ульяна ЗАХАРОВА, «Саха сирэ» хаһыат, edersaas.ru