Уопсастыба

Коронавирус: томполор «Халыма» суолугар дьону бэрэбиэркэлииллэр



Бу күннэргэ «Халыма» федеральнай суолунан  айаннааччылар кинилэри СӨ ИДьМ ГИБДД үлэһиттэрэ суолга тохтоппуттарын кэннэ, эмчиттэр массыынаҕа олорор дьон температураларын кээмэйдээбиттэрин туһунан социальнай ситимнэргэ иһитиннэрдилэр.

edersaas.ru

Бу Томпотооҕу Ис Дьыала отделын салайааччытын б.дь. кулун тутар 18 күнүнээҕи 66/444 №-дээх дьаһалыгар олоҕуран, Томпо улууһун киин балыыһатын эмчиттэрин кытта СӨ ИДьМ ГИБДД үлэһиттэрэ сэбиргэхтэтэр ыарыыны көбүтэр коронавируһу утары үлэ чэрчитинэн такси сулууспатын суоппардарын уонна кинилэр пассажирдарын бэрэбиэркэлэрэ эбит.

 

Томпо улууһун сиринэн-уотунан ааһар дьону бэрэбиэркэ күнүстэри-түүннэри суукканы эргиччи ыытыллар.

Онон массыынанан айаннаан испит Өймөкөөн улууһун олохтоохторо «хата, түгэнинэн туһанан, биһиги доруобайбытын бигэргэттибит — коронавируһу утары Томпо улууһун салалтата кытаанахтык ылсыбыт» диэн холобур туттан, социальнай ситим нөҥүө санааларын үллэстэллэр.

Кырдьык, томполор холобурдарын батыһан, атын федеральнай суолларга эмчиттэри кытта маннык ГИБДД постарын олохтууллара буоллар, өрөспүүбүлүкэ дьоно харысхаллаах курдук сананыа этибит.

Елена ПОТОЦКАЯ, «Саха сирэ» хаһыат, edersaas.ru

Хаартыска — Томпо улууһун дьаһалтатын инстаграмыттан.

0
2

Добавить комментарий