Бүгүн, атырдьах ыйын 4 күнүгэр, 12:00 чааска Саха сирин Ил Дархана Айсен Николаев эрэгийиэҥҥэ коронавирус балаһыанньатын туһунан брифинг ыытта.
Ил Дархан Айсен Николаев:
— Бүтэһик сууккаҕа Саха сиригэр өссө 53 киһи коронавируска сутулунна, онтон 39 киһи Дьокуускайга, түөрт киһи Ленскэй оройуонугар, үстүү киһи Мэҥэ Хаҥаласка, Үөһээ Бүлүүгэ, биирдии киһи Дьааҥыга, Чурапчыга уо.д.а. оройуоннарга ыарыйда. Дьокуускайга биир тэҥ балаһыанньа ый курдук турар. Оттон улуустарга ыарыы үксүн Дьокуускайтан тарҕаммыт. Маныаха миэстэтигэр доруобуйа харыстабылын үлэһиттэрин үлэлэрин бэлиэтиэм этэ. Ыалдьыбыт, хантаактаах дьону түргэнник быһаараллар, анаалыһы ылаллар, эмтииллэр.
Билигин өрөспүүбүлүкэ үрдүнэн 1200-тэн тахса киһи дьаҥтан эмтэнэ сылдьар. Онтон 50 %-на стационарга, 50 %-на амбулаторнайдык эмтэниини ааһар. Амбулаторнайдык эмтэнэр дьоҥҥо босхо эмп түҥэтиллэр.
Хомойуох иһин, билигин 26 киһи ыарахан туруктаах.
edersaas.ru