Коронавирус каартата тугу көрдөрөрүй?

Бөлөххө киир:

“Стопкоронавирус.Якутия” каартаҕа күн аайы ханна, төһө киһи ыалдьыбыта ырылхайдык көстөр. Манна киирэн, бэйэҥ дьиэҥ, аттынааҕы уулуссалар балаһыанньаларын көрүөххүн сөп.

edersaas.ru

Бэс ыйын 8 күнүнээҕи туругунан, Дьокуускай куоракка 1095 киһи коронавируһунан ыалдьан, балыыһаҕа сытар, 132 ыалдьыбыт киһи дьиэтигэр амбулаторнай эмтэниини ылар, 1717 киһи хантаактаһан, дьиэтигэр олорор, 879 киһи өрөспүүбүлүкэ тас өттүттэн кэлэн, икки нэдиэлэлээх хааччахтааһыҥҥа олорор диэн каарта көрдөрөр.

Манна кыһыл өҥүнэн ыалдьан, балыыһаҕа сытааччылары, фиолетовай өҥүнэн амбулаторнай эмтэнээччилэри, араҕас өҥүнэн хантаактаахтары, күөх өҥүнэн хааччахтааһыҥҥа олорооччулары көрдөрөр. Сокуон ирдэбилинэн, чааһынай дьиэлээх дьон ыалдьыбыт буоллахтарына, аадырыстарын көрдөрүө суохтаахтар. Онон манна элбэх кыбартыыралаах дьиэлэр эрэ көстөллөр.

Сүрүннээн, дьиэҕэ биирдии-иккилии киһи ыалдьар эбит, ол эрээри, 4-5-6-лыы киһи ыалдьар аадырыстара аҕыйаҕа суохтар. Сэрэйдэххэ, бу дьиэ кэргэнинэн ыалдьар дьон буолуохтарын сөп. Халтурин уулуссатыгар баар обсерваторга 21 ыалдьыбыт киһи баар диэн көрдөрөр. Ыам ыйыгар манна 50-тан тахса киһи баара. Оттон Сэргэлээххэ устудьуоннар ыалдьан үтүөрбүттэр эбит, ыам ыйыгар манна 100-тэн тахса киһи ыалдьыбыта көстөр этэ.

Ыраахтан көрдөххө, Дьокуускай “кытаран” олорор. Бастаан күҥҥэ биэстии-уоннуу киһи ыалдьар этэ, хантаактарын түргэнник быһаараллара. Билигин күҥҥэ 70-80, бэл, 90 киһи бу дьаҥҥа сутуллар. Ол эбэтэр, хантан сыстыбыттарын үксүгэр билбэттэр. Маҕаһыыҥҥа, тэрилтэҕэ, ону тэҥэ, үлэлии сылдьан, сутуллубут буолуоххун сөп. Оҕолор үксүгэр ыалдьыбыттара биллибэт, онон оҕо былаһааккатыгар тахсан, атын оҕолору, дьиэ иһинээҕилэри барыларын сутуйуохтарын сөп.

Ону тэҥэ, ыам ыйыгар дьон өр кэмҥэ дьиэҕэ олорортон сылайан, таһырдьа, айылҕаҕа тахсан, доҕотторун, аймахтарын кытта көрсүһэн, харыстаныы миэрэлэрин кэспиттэрин түмүгэр, ыарыы элбээбитэ саарбаҕа суох.

Онон, сайын үтүөтүн балыыһаҕа атаарбат туһуттан, бары миэрэлэри тутуһан, харыстана сырыттахпытына эрэ, бу уодаһыннаах ыарыыга ылларбаппыт буолуо. Бэйэҕин, чугас дьоҥҥун харыстаабатаххына, ким кэлэн харыстыай, кимиэхэ сэлээнниэҥий?

Ангелина Васильева, “Саха сирэ” хаһыат, edersaas.ru

Хаартыска: Стопкоронавирус.Якутия

+1
0
+1
0
+1
0
+1
0
+1
0
+1
0
+1
0