Бүгүн сарсыарда Нам улууһугар бастакы киһи коронавирус дьаҥыгар сутуллубута биллибитэ. Аны күнүс иккис киһи анаалыһа бигэргэннэ. Бу туһунан өрөспүүбүлүкэтээҕи суһал штаб иһитиннэрэр.
Нам улууһун I Хомустааҕын олохтооҕо ааспыт нэдиэлэҕэ Дьокуускайга харах балыыһатыгар эмтэммит. Балыыһаттан эмтэнэн дойдутугар тиийэн баран, эр киһи ыарытыйбыт. Бу түүн нэһилиэк балыыһатын исписэлиистэрэ кинини оройуон балыыһатыгар киллэрбиттэр. Онно коронавирус дьаҥар анаалыс туттарбыт, ол түмүгэ бэҕэһээ биллэн, эр киһи дьаҥҥа сутуллубута биллибит.
Онон, бу киһилиин хантаактаспыт дьону быһаарбыттар. Маныаха эр киһи аҕатын анаалыһыгар коронавирус дьаҥа баара бүгүн күнүс билиннэ. Бу дьиэ кэргэн бары ОРВИ ыарыы сибикилээхтэр, онон анаалыс туттардылар, түмүгүн күүтэллэр.
Улуус баһылыга, суһал штабы салайааччы Юрий Слепцов этэринэн, бастаан ыалдьыбыт киһини Дьокуускайга инфекционнай балыыһаҕа илдьибиттэр, оттон аймахтарын — биэс киһини Нам инфекционнай балыыһатыгар киллэрбиттэр. Оройуоннааҕы суһал штаб хантаактаахтары быһаарар.
Нам киинигэр баар педагогическай кэллиэс уопсайыгар 130 куойкалаах обсерватор тэриллибитэ. Манна дойду атын эрэгийиэннэриттэн кэлбит 15 киһи баар.
Социальнай ситимнэргэ улуус кыраныыссатын саппыттарын туһунан сурах тарҕанна. Бу маны баһылык Юрий Слепцов сымыйа сурах диэн иһитиннэрэр. Нам уонна Дьокуускай кыраныыссатыгар ДПС дьуһуурустубалыыр.
edersaas.ru
СИА хаартыската.